Aizawl, the 28th January 2026: Vawiin chawhnu khan Home Minister Pu K.Sapdanga leh I&PR Minister Pu B. Lalchhanzova te chuan Home Minister Office Chamber-ah Kum 2026 Republic Day lawmna inkhawma chanchinbumite lungawilohna te bawhzuiin Republic Day Organising Department zinga mawhphurhna pawimawh deuh latute Aizawl Deputy Commissioner Office, State Protocol Office leh Directorate of Information & Public Relations hotute an kawm a. He hunah hian IPRP&S Secretary Pi Betsy Zothanpari Sailo, Aizawl Bawrhsap Er. Lalhriatpuia, State Protocol Officer Pu Lalmuansanga Ralte, DIPR Joint Director pahnih – Pi Mina Zoliani Joute leh Pu Malsawmsanga, DIPR Deputy Director Pu Andrew H. Lalremruata te an tel a ni.
Home Minister Pu K.Sapdanga chuan Republic Day lawmna inkhawm leh “Governor’s At Home” chungchanga chanchinbumite’n lungawi lohna leh harsatna an nei chu pawi a tih thu sawiin, he thil thleng chungchanga ngaihtuah ngai leh ennawn ngaite sawiho a pawimawh avanga inkokhawm an nih thu a sawi a, hun lo kal leh zel turah felfai zawka ruahmanna kalpui a nih theih nan a huaihawttu sawrkar official-te nen sawiho a pawimawh tih thuhma a sawi a ni.
IPRP&S Minister Pu B. Lalchhanzova chuan Chanchinbumite chu Sawrkar hunpui leh pawimawh ti phuisuitu leh tizahawmtu a ni a. Hetianga ruahmanna fumfe loh avanga harsatna an tawk hi pawi a tih thu a sawi. I&PR Minister chuan chanchinbumite lungawilohna an hriat rualin official lam thu leh hla hriat a pawimawh tel tih sawiin, a inchotuah zawng ni lova a zaizap zawnga indawr tawn a pawimawh tih sawiin, that leh that inlawm tawn a, harsatna kan tawh kara hma kan sawn zawk theihna tur zawn thiam a pawimawh a, thil tha zawk he kan thil tawn atang hian a lo chhuah kan beisei a ni a ti bawk.
Home Minister in sawmna a siam angin IPRP&S Secretary, Aizawl Bawrhsap, State Protocol Officer leh I&PR Officer te pawhin official lam atanga sawitur an neih te an sawi a. He hunah hian Secretary Pi Betsy Zothanpari Sailo chuan MJA lam hruaitute leh MJA member te nen pawh an inbiak tawh thu te, official lam atanga insiam that ngai lai te pawh a awm thu te a sawi a. MJA te pawh sawrkarin an lungawilohna te a ngai thutak a, chutiang bawkin MJA lam te pawh mi puitling leh khawhawi zau an nih anga hmalam pana, ram tana theihtawp chhuah turin a chah bawk tih a sawi a ni.
Aizawl Bawrhsap Er. Lalhriatpuia pawhin chanchinbumite lungawi lohna lo thleng chu pawi a tih thu sawiin, anmahni lam pawh an inchhui let nasa a, an naute zinga inzilh ngai leh inhrilhfiah ngaite pawh hma an lak tawh thu a sawi a, a tul ang zela hma lak a nih tur thu leh tun hnuah chuan uluk leh fimkhur zawka hma an lak tawh tur thu a sawi a ni.
Vawiin thutkhawmah hian inpawh tlang taka sawihona neih a ni a, Aizawl DC kaihhruaina hnuaiah Protocol Office leh Directorate of Information & Public Relations ten hun remchang hmasa berah MJA hruaitute kawma inpawh tlang taka sawihona neih tha an ti a, Republic Day leh Independence Day-ah Media enclosure siam ziah tawh nise an ti bawk a, sawmna semchhuah chungchangah pawh fimkhur lehzuala kalpui nise an ti bawk.
