HSSLC 2026, Result a tihchhuah-ah zirlai exam zinga za-a 87.67 an pass
Vawiin-a Mizoram Board of School Education-in Higher Secondary School Leaving Certificate (HSSLC) 2026, Result a tihchhuah-ah zirlai exam zinga za-a 87.67 an pass a, kumin atangin Top 10 bakah zirlaite pass na division tarlan a ni lo.
Kumin-ah hian zirlai exam hi 12243 an ni a, an zinga zirlai 10734 in an pass-a, exam zawng zawng zinga za-a 87.67 an pass a ni. Nikum 2025 leh kum hmasa 2024 aiin pass percentage a tha zawk a, kumin hian a pumpui khaikhawmin Arts Science leh Commerce-ah kum kalat aiin pass percentage a sang zawng a, nikumah za-a 81.10 a nih laiin, kuminah za-a 87.67 a ni a, nikum aiin za-a 6.57 in a sang a ni.
Kumin HSSLC exam-ah hian compartment 115 an awm a, kumin-ah hian mipa aiin hmeichhia exam hmachhawn 1,033 in an tam zawk a, hmeichhia an pass tam zawk bawk a. Mipa aia hmeichhe hi 904 in an pass tam zawk a ni. Kuminah hian Arts Subject ah mi 8714 an exam a, 7575 in an pass a, hlawhtling zat za-a 86.93 an ni. Science Subject a mi 2770 exam zingah 2472 in an pass a, hlawhtling zat za-a 89.24 an ni a. Commerce Subject-ah 759 exam zingah 687 in an pass a, hlawhtling zat za-a 90.51 an ni bawk.
MBSE Chairman JH Zoremthanga chuan, MBSE pisaah thuthar lakhawmtute a kawm naah, kumin hian compartment exam 115 te tan exam buatsaih thuai an tum thu a sawi a. NEP 2020 ruahmanna angin subject 1-a improvement exam pawh kuminah hian buatsaih an tum thu a sawi bawk.
