I&PR Director in District I&PR leh MJA te ram leh mipuite tana thawkho zel turain a fuih
11th May 2026 Vawiin khan I&PR Director Pi K. Vanlalsangi chuan District Information & Public Relations Office, Lawngtlai a tlawh a. Pu Zonunchama Ralte, DIPRO, Lawngtlai, leh Staff- te bakah Mizoram Journalist Association (MJA), Lawngtlai, ten lo dawngsawngin inkawmhona hun an hmang nghal.
Pi K. Vanlalsangi chuan DIPRO, Lawngtlai leh MJA, Lawngtlai te inkar a thawhhona tha tak awm thin chu lawmawm a tih thu tarlangin, hmalam hunah pawh thawhhona tha zawk nei zel turin a sawm a. Sawrkar thuchhuak dik taka thehdarh bakah department - te hmalakna kawng hrang hrang puanzar kawngah DIPRO Office chuan mawhphurhna an nei lian hle tih tarlangin, sawrkar rin tlaka thawk thin turin a chah a. MJA leh I&PR- te chu ram leh mipuite tana thawkho, innghen tlat an nih angin, ram leh mipuite tana thawkho zel tura fuihin, thuthar thehdarh leh sawrkar hmalakna puanzar kawngah District - mipuite tan a theihtawp chhuah zel turin a sawm nghal bawk.
MJA, Lawngtlai chuan I&PR Director in Lawngtlai a lo tlawh thei chu lawmawm an tih thu tarlangin, heihian rah tha a chhuah ngei an beisei tih an sawi a. MJA leh I&PR chu kawng engkima thawkho tlat an nih thu tarlangin, sawrkar thuchhuak, hmalakna leh mipuite hriat tur pawimawh thehdarh kawngah theihtawp an chhuah tlan thin thu an tarlang a. Ram leh hnam siam that kawngah MJA leh I& PR chuan mawhphurhna lian tak an nei tih sawiin, hma lam hunah thahnem ngai taka an thawhdun zel tur thu an tarlang a ni.
Pi K. Vanalsangi hian DIPRO Office Lawngtlai hmunhma leh Buliding - te a enfiah nghal a. Vawiin vek hian DIPRO Office Siaha a tlawh nghal bawk a ni.
