International Olympic Day 2026 Lammual-ah hman a ni
Dated Aizawl, the 23rd June 2026 : International Olympic Day 2026 pualin Mizoram Olympic Association chuan Olympic Day Run leh Plantation Drive a buatsaih a. Infiammi 631 ten Chanmari kawn, Dinthar leh Sikulpuikawn atangin Lammual an pan a, Environment Forest & Climate Change Minister Lalthansanga’n khuallian niin hun a hmanpui.
Minister chuan thu sawiin, Olympic Day puala thingphun ngaih pawimawh a ni chu lawmawm a tih thu a sawi a, environment thatna state chu state hausa an nih thu sawiin, kalkhawmte chu thingphun leh ramngaw humhalh ngai pawimawh deuh deuh turin a chah nghal bawk a ni. Infiammi kal khawmte hnenah chuan inzahtawnna te, hun vawn dik te, mahni inthunnunna te leh dawhtheihna te ngaih pawimawh a tul thu sawiin, infiamna chu huatna ni lo a in unauna tha zawk infiammite inkara thlen thei tu ni ngei se a duh thu a sawi bawk.
Khual zahawm Sports and Youth Services Minister Lalnghinglova Hmar pawhin thu sawiin, Olympic Day puala Olympic Day run hman a ni thin chu tha a tih thu sawiin, Mizoram chu a hminga Olympic Day lo zawm ve tu mai ni lo a, Olympic ah ngei Mizo infiammi tam zawk kan la tel ve ngei a beisei tlat thu a sawi bawk a ni.
Olympic Day Run ah hian Infiamna pawl chi hrang hrang 15 chuang atangin mi 631 an inlan a, pawl tlan tam te hnenah lawmman sem a ni a, Mizoram Table Tennis Association chu pakhatna niin cheng 10,000 hlan an ni a, Mizoram Football Association leh Mizoram Wrestling Association ten lawmman pahnihna cheng 5000 an la a, Hockey Mizoram leh Mizoram Amateur Taekwondo Association ten lawmman pathumna cheng 4000 an la bawk a ni. Lawmman pawisa fai an sem rual hian thing tiak hlan tel nghal zel an ni bawk.
Olympic Day lawmna hi Mizoram Olympic Association President Robert Romawia Royte chuan kaihruaiin, MOA Secretary General, V. Lalzawmliana hnen atangin report ngaihthlak a ni a, MOA Senior Vice President Pu F Lalnienga’n lawmthu sawina in hun a khar a. Lammual a hun hman zawh hian, Muallungthu a Mizoram State Sports Council Ground-ah thing tiak phunna hun hman chhunzawm nghal a ni.
