Kalphung Tharah Thu Thar Thehdarhtute Hlutna Tlahniam. MPYCC
India ram ni pawimawh Republic Day vawi 77-na lawmna pui ber neih turah Sorkar atanga Republic Day lawmna Lammual leh Governor At Home-a Accredited Journalist-te sawmna an pek danah thil fel tawk lo a awm chu Congress Thalai chuan pawi a ti tak zet a. Mipui hnena thuthar thehdarhtute thutna (PRESS Gallery) siam a ni lo leh sawmna mawlmang tak pek an ni hi Congress Thalai chuan an zahawmna leh pawimawhna palzutnaah a ngai a, kum tam tak hnuah hetiang hun pawimawha a vawi khat thlenna niin; Kalphung Tharah a tha lo zawnga mellung phun a ni hi Congress Thalai chuan pawi a tiin Social Media lamah Press mite beih zuina leh demna hmuh tur a awm chu thil tha lo tak a ni tih hriaa ti tawh lo turin Congress Thalai chuan ZPM sorkar a ngen a ni.
ZPM sorkarah Thuthar thehdarhtute palzutna hi a vawi khat thlenna a ni lova. Nikum October ni 13, 2025 khan Serchhip MJA Silver Jubilee Programme-ah Chief Minister Pu Lalduhoma chu bialtu MLA a nihna angin sawm a ni a. He hunah hian Pu Lalduhoma chuan District dang atanga kal MJA hruaitute an hming a lam (address) vek laiin Mizoram pum huapa MJA President leh an programme hman chhan Pu C. Lalrambuatsaiha chu a address hmaih lui tawh bawk.
Pu Lalmuanpuia Punte, Adviser to Chief Minister pawhin ZPM party chhung inkhawmah mawi lo tak leh dik lo takin MJA te chu an inthlanna atan sorkarah pawisa (Fund) dil thin angin a lo sawi tawh a. MJA chuan Pu Lalmuanpuia Punte hi Aizawl Press Club-ah lengah sawmin MJA in chutiang an tih ngai loh thu hrilhin amah Pu Lalmuanpuia Punte pawhin a tihsual a ni tiin MJA office ah ngaihdam a lo dil tawh a, hetiang a nih laia Chief Minister-in MJA President hming a lam ri duh lo leh India ram ni pawimawha thuthar thehdarhtute pawimawhna palzut zawnga ruahmanna an siam hi Mizoram tan mualphona nasa tak a ni a. Thuthar thehdarhtute (Journalist) te hi ram inrelbawlna kawnga lungthu pathum an tih zinga a pa li (4) na, The fourth Estate Pillar an tih hial, ram changkang apianga an ngaihhlut an ni tih hriain ZPM sorkar hian Mizoram Journalist Association hnenah thupha chawi turin Congress Thalai chuan a ngen a ni.
