MPCC President Lal Thanzara chuan Dampa bial by-election lo awm tur atan campaign zel in West Phaileng Dinthar kawn-ah Public Meeting a nei.
MPCC President chuan, by-election lo awm tur-ah hian bial chhung mi candidate pahnih an awm tihsawiin, ZPM Candidate hi Pathian fak a zai a rawngbawl thin a ni a, tunah hian lo thlang tling pawh ni ula, a nih tur zawng zawng an nih tawh avangin MLA fang mai a ni dawn a. Thil ropui tak engamah tihsak theih a neih dawn loh che u avangin in rel leh mai mai anga, chutiang atan chuan in phal ka ring lo. In khawngaih a in phal lo anih chuan vote lo mai ula a that ka ring, a ti.
BJP hi chu Mizo Kristian tan chuan vote chi an ni lo tih kan hria tiin MPCC President chuan, hmanni lawk khan Union Minister Kerala lam mi Goerge Kurian chuan BJP hi Kriatiante tan an hlauhawm loh, kei pawh Kristian ka ni, a ti a. BJP sorkar hnuaiah Kristian Missionary te khuan harsatna nasa tak an tawk mek a. Missionary an nih pawh an sawi ngam tawh lova, NGO a thawk ang ten an insawi ngam tawk tawh a ni, a ti a. Kurian-a hi lo hrilh thei in awm chuan kan missionary te hi RSS te, Bajrang Dal te, VHP te hian kan Kristian Missionary te hi an tiduhdah mek hi titawp tura hma la turin lo hrilh ula ka duh a ni, a ti bawk.
MPCC President chuan, MNF hian an ngam loh chalah chil an hnawm a, kum 20 tal tawp rambuaiah kan awm phah a ni, a ti a. Tuna an Candidate hi an headquarter ah pawh an hnawl a ni a. An Candidate hi in thlang tling anih chuan MNF hian an buai phah mai mai dawn a. 2028 ah pawh hian a thawh zawh ka ring lo, a ti.
Tun hnaiah Centrala BJP sorkar khuan Mizoram Presbyterian Synod chu income tax a rawn thing tih sawiin, MPCC President chuan, Synod hotu te pawh Central-ah income tax lam hotute dawrin an buai hle a ni, a ti a. Synod hian thuchhuah te siamin kohhran hrang hrang hnenah thuchhuah siamin lo fimkhur turin an hriattir a. Hetiang thil hi Congress kum 60 sorkar chhungin a thleng ngai lo niin a sawi bawk.
MPCC President chuan, tun by-election lo awm turah hian John Rotluangliana in thlan tlin chuan kum 2028-ah hian Congress kan sorkar ngei ka ring a. 2028-ah Congress kan sorkar chuan thingtlang leh khawpui a mi harsa te tan eizawnna bul an tan na turin NLUP kan kalpui leh dawn a ni, a ti bawk.
