Kan leiba kan budget aiin a sang. CM khuallian-ah vawi 94 a tang tawh. MPCC Treasurer
Vawiin February 27, 2026 (Zirtawpni) khan Mizoram Pradesh Congress Committee chuan Political Session an nei a. MPCC Treasurer Dr. Lalmalsawma Nghaka chuan thu sawiin, "ZPM sorkar hian 2023 inthlan dawn khan, ‘Puktu ni lovin, puk tirtu kan ni ang,’ tiin an sawi a. Kumina kan budget hi vbch 17469.92 a nih laiin, kan leiba hi vbch 19085.15 a ni mek a, kan leiba hi kan budget aiin a sang ta der mai. Kum 2 chhungin vbch 6375.86 in a pung hman a, an term tawpah phei chuan vbch 25,000 chuang a ni hman dawn niin a lang" a ti.
MPCC Treasurer chuan, "MNF sorkar khan leiba a ngah thu hahipin kan sawi a, mak kan ti a. Vawiina kan sorkar hrawn mek hi sum leh pai enkawl thiamah inngai mah se, an thiam loh zia a lang a, chhiarkawp thiam pangngai chuan a punna hi kan hrethiam vek a. Congress khan leiba a pun loh nan theihtawp kan chhuah a, kan sorkar loh hun kum 7 chhung hian leiba lamah hma kan sawn a, ZPM sorkar hi Leiba tih pun lamah an rawn champion chho mek a, MNF sorkar a rawn pel ta a ni" a ti bawk.
Dr. Malal chuan, Kum 2023 inthlan campaign lai khan kan minister-te khualliana an tang thin kha tul lo an ti hle a. Tunah hian kan CM chauh pawh hi vawi 94 khuallianah a tang tawh a, hnathawh ni (working days) atanga chhutin khualliana a tan ni hi a tam lutuk a.
MNF khan kan sum leh pai dinhmun nasa takin an tichhia a, chung zawng zawng nuai bo intiam ZPM te hian eng nge an tih? PWD deptt. ringawta December restricted tender Amount kum 2 chhung belhkhawm chu ₹10,67,98,54,293/-(Vaibelchhe sangkhat sawmruk pasarih, nuai sawmkua pariat, sing nga, sangli, zahnih sawmkua leh pathum) a ni tawh a. Heng hna aṭangte hian GST 18% leh Labour Cess 1% la ta nise, sorkar sum hum tur chu ₹202,91,72,315.67/- (Vaibelchhe zahnih pahnih, nuai sawmkua pakhat, sing sarih, sanghnih, zathum sawm panga) a ni, a ti.
Dr. Mala chuan, Pu Zoramthanga te sorkar pawh khan em em an tih a rinawm hle a. ‘Ka ti ve lovang’ tite hian quarters sak thlenga restricted tender an ti thil dik lo chu a ni. Kan CM-in corruption awm lo anga a sawi kha a vanduai thlak hle a. Hei lo liama corruption hi a awm thei lo. Heng thilahte hian mantang ei an awm em ni? Contractor ten an va sawi sep se si ve. Zoram mipuite hian thil kalhmang kan enfiah a ngai tawh hle. Duhsak zawngte hna inpek hmiah hmiah hi corruption a ni, a ti bawk.
MPCC Treasurer chuan, kum 2 chhung kawng chhia mipuiin kan tawrh tawh hnuah an rawn siam a, social media lama an rawn infak vak hi a zahthlak. Kan kawngte hi mipui chhiah atanga siam a ni a, mipui siam zawk a ni. Mipuiin oil kan thun apiangin litre-ah cheng 2 kan thawh a, lirtheia eizawngte hian thla tin Rs.1000 chuang thawh ziah ang an ni a. Sorkar hian mipuite hnenah lawmthu a sawi tur a ni. Kan sorkar hi insawi theih lamah chuan an champion a, a tiha tih lamah chuan a champion si lo va, a vanduaithlak hle, a ti bawk.
