Vairengte, Sairang, Kolasib leh Bairabi inkar kawng chhe lutuk chu sorkar in October ni 19.2025 thlenga an siamthat loh a nih chuan, Kolasib district a lirthei hmanga eizawng pawl hrang hrang ten, he kawngah hian tlan tawh rih loh an tum.
Mizoram Tipper Association (MTA) Kolasib district leh Kolasib District Drivers' & Owners' Joint Action Committee te chuan Inrinni khan thu chhuah siamin, Mizoram chaklakna ber Vairengte leh Sairang inkar leh Kolasib leh Bairabi inkar kawngpuite chu lirthei tana zawh hlauhawm khawpa chhia, vanduaina thleng thei a nih thu an sawi a. Lirthei khalhtute'n harsatna nasa tak an tawk mek tih an sawi bawk.
He kawng pawimawh tak hi siamtha thuai hian Inrinni khan Kolasib Bawrhsap hnenah ziaka an thlen thu sawiin, a copy hi Kolasib SP leh Kolasib-a National Highway Division EE te an pe bawk a. Lehkha-ah hian, lehkha an dawn atanga October ni 19 inkar chhunga kawngpuite hi siam that a nih loh chuan, an lirtheite an tlan tawh dawn lo tih an sawi a. Kar kalta lama ruah sur nasa avang khan he lai kawng chhe tawh sa hi a chhe leh zual hle a. Lirthei tlu leh tang a tam hle niin an sawi bawk.
He tih lai hian nimin (Pathianni) khan Kawnpui atanga Aizawl lam pan lirthei 578 chhuah an awm a. Sairang peng leh Kamrang inkar atanga Vairengte lam pan tur chhuah a awm lova. Khamrang-ah hian Vairengte lam pan tur lirthei 263 a tangkhang mek a. Aizawl lam pan tangkhang a awm lo a ni.
Mizoram Truck Drivers’ Association (MTDA) hruaitute chuan kar kalta laihawl vela ruahsur avang khan Sairang leh Kawnpui inkar kawng chhia chu a nal zual hle a. Truck ruak thenkhat kal thei lova tlu leh kawng nala tang an awm tam hle a. Kolasib district-a lirthei hmanga eizawng pawlte thutlukna chu an thlawp ve dawn em tih vawiin-ah an ngaihtuah tur thu an sawi bawk.
