Kuhva Ro Bag 5,741 bo chu tun thlengin hmuhchhuah a la ni lo.
Vairengte leh a chhehvel kudam-a sorkar chhinchhiah tawh, khawih chet tawh loh tura tih kuhva ro bag 9,635 atanga bag 5,741 bo chu tun thlengin hmuhchhuah a la ni lo.
Home Minister K. Sapdanga chuan Assembly thutkhawmah ziaka zawhna chhangin, kuhva mansa bo then chungchangah hian man an la awm loh avangin tu chungah mah action lak a ni lova, kudam neitute lakah Criminal Complaint case 24 thehluh a ni thung tih a sawi.
Hei bakah hian Home Minister chuan kum 2023 atang khan Mizoram ramri-a Mizoram Police te’n check gate an enkawlah te, Police duty-te chu pawisa khawn lo turin thupek khauh tak an siam a, thupek hi theihtawpin an kengkawh reng a ti a. Kum 2025 chhung khan hetianga Police check-gate a Police mi leh sa pawisa lo dawng mi paruk hriatchhuah an ni a, heng mi paruk te hi dan anga hremna pek an nih thu a sawi bawk.
