MNF Party in Lengpui ram hralh chuangchang CBI chhui tir an phut a. ZPM sorkar hian an ngam ngei tur a ni, an ti.
MNF Party Treasurer Lalruatkima'n vawiin Inrinni khan hemi chungchang-ah hian thuthar lakhawmtute a kawm a.
A kimchang:-
PRESS STATEMENT OF
LALRUATKIMA
TREASURER MNF & CHAIRMAN PUBLICITY BOARD
24.01.2026
LENGPUI LAND SCAM HI CBI CHHUI TIR NI RAWH SE
Indian Airforce hnena Lengpui ram hralh anih danah tlan paha chhiar theih khawpa langsar, nasa taka Dan bawhchhiatna a thleng a. Ram lak/hralh anih tur thu sorkarin Dan ang taka hriattirna, Preliminary Notification a tih chhuah atanga ni 70 chhung lekin ram neitu dik tak pawh ni lo, a buaipuitute kutah cheng vbc. 188 zet pek chhuah vek hman a ni a, ram lak kalpui dan (acquisition process) chak ber record a nih a rinawm. Lengpui-a ram neitu mi 8 (pariat) te hmingin ram leina man, Compensation/Award hi siam a nih laiin, heng ram 8 (pariat) te leikhawmtu nia insawi Pu Rohmingliana hnenah Aizawl DC Office chuan 25.07. 2025 leh 26.08.2025 te khan a belhkhawmin cheng vbc 70 a pe chhuak a, abak zawng cheng 1,17,90,26,341.00 (vbc. 117.90) zet chu ram neitu ni ve miah lo, a buaipuitu nia sawi, Pu Henry Lalremsanga Hlawnmual hnenah 25.07.2025 khan pek vek a ni a. Award/ Compensation siamna hming tumtu, ram neitu dik tak mi 8 (pariat) te chuan cheng khat mah an chang ve lo thung a ni.
Chief Minister Pu Lalduhoma kaihhruai ZPM sorkar hian hna hmasa berah Indian Airforce hnena Lengpui Airport hralh a tum nghal a, sorkar hmalak dan Assembly House-a sawi chhuah anih tum, 21.2.2025 khan tuna Airforce hnena ram hralh tak chungchang hi Chief Minister chuan a sawi chhuak a, file mu tawh sa reng chu 'tih tawp (Kept in abeyance) a ni' tiin ropui hmel takin a sawi a, hun reiloteah a ruka file chu ko kal leh thutin a hmanhmawh thei ang ber leh Dan tam tak kal kan leh palzut chungin hma a lo la char char zawk tih a lo lang ta a ni.
Assembly House-ah hmalakna tih tawp a nih thu a puan atanga thla 3 pawh a ral hma 15.5.2025-ah Lengpui ram, Indian Airforce te hnena hralh tura Dan ang taka hmalakna hmasa ber, 'Preliminary Notification' chu Mizoram sorkar chuan a ti chhuak ta mai a. Aizawl DC office chu ram lak/hralh tur enfiah hna preliminary survey thawk nghal tur leh ni 15 chhunga land record te chingfel vek turin Notification hmang hian Mizoram sorkar chuan a hriattir a. Hmanhmawh taka thil kalpui anih avangin RFCTLARR Act, 2013 hnuaia ram lak anih dawna tih hmasak ngei ngei ngai 'Social Impact Assessment (SIA)' pawh kal kan (exempt) a ni a, SIA kal kan phalna hi Land Revenue Minister Pu B Lalchhanzova chuan 15.5.2025 ah tho khan a pawmpui (approved) chuk chuk a ni.
SIA kal kan phalna Revenue Minister in a pawmpui ni veka Preliminary Notification tih chhuah nghal rum rum a nih bakah hian, Preliminary Notification hi Danin a phut anga puanzar a ni lo a, a ram neitu Lengpui khawtlang hruaitute hriattir an ni lo a, chanchinbu-ah chhuah a ni bawk lo a, sawisel duh neite tana ni 60 chhung hun hawn thin pawh ni 15 lekah pawh tawi a ni a, a ruk thei ang ber leh a rang thei ang berin, Dan tam tak kal kan leh palzut chungin, ZPM sorkar hian Indian Airforce kuta Lengpui ram hralh anih theihna tur hian hma a la a. Cheng vaibelchhe 188 vel zet hu ram hralh buaipui hna hi ni 70 chung vel lekin, a bul atanga a tawp thlengin an zo fel vek a ni.
ZPM party-in midang aia tha bik, dik bik leh fel bik tur a mipui hma a nasa taka an inzawrh hnuah Mizorama ram lei scam/scandal lian ber a lo thleng ta mai hi zahthlak kan tiin pawi kan ti a, hmanhmawh tak leh hnawhsarum taka hma lak a nih dan en hian sorkar thuneitu sang atanga nawrna a na hle tih a chiang a, CM leh sorkar thuneitute hi thuk takin an inrawlh ngei niin a lang. Assam Rifles Biak In hmun pawh party office atana it ngawih ngawihtute hi Party office leina sum tuak kawnga an thahnem ngaih zia mipui ten kan hre vek a, Airforce ram tur leinaah hian dik lo taka hlawkna teltu, mantang eitu zawng zawngte chhui chhuak vek a, dan anga hremna lek kawh anih ngeina turin CBI chhuitir kan phut tlat a ni.
Hetianga thuneitu sangte nawrna avanga a ruk a rala hmanhmawh tak leh Dan tam tak bawhchhe chunga ZPM sorkarin Lengpui ram a hralh dan Pu HC Vanlalruata Journalist in a chhui chianna chu Thawhtanni zingah Chanchinbu-ah a rawn chhuak ta a, hemi ni vek tukthuan eikhamah Chief Minister Adviser Pu TBC Lalvenchhunga chuan ZPM party office-ah sawifiah nghal tumin 'sorkarin a hriatpui lo a, DC level-ah engkim chinfel a ni' tiin thu dik lo hmanga mipui rilru hruaikawi a tum zui a ni.
Hmanhmawh taka ram hralh anih theihna tura Social Impact Assessment kal kan phalna Exemption dilna pawmpui (Approved) tu chu Revenue Minister Pu B Lalchhanzova a ni a. Preliminary Notitication' 15.5.2025 khan tihchhuah a ni a, Lengpui ram hralh hi ZPM sokarin a hriatpui a ni mai lova, Minister approval ngeia hralh tura hmanhmawh taka hmalak a ni. Sorkar ram lakna Dan hnuaiah ram leitu chu sorkar a nih zel avangin Lengpui ram hralhtu pawh hi ZPM sorkar ngei a ni a. Chief Minister Adviser hian mipui hmaah hre reng chungin thu dik lo a sawi lui a ni. Hetiang thudik tawk lo hmanga mipui rilru hruai sual ching Adviser to CM kan nei hi a vanduaithlak a, tunhnuah sim tawh se kan duh hle a ni.
MNF sorkar huna engkim tih fel vek tawh anga Pu TBC Lalvenchhunga'n a sawi pawh thu dik lo a ni. MNF sorkar hma atang tawhin Indian Airforce te hian Mizoramah ram lak tur an dap tan tawh a, Central sorkar leh state sorkar indawr tawnnaah ram lak tur an dap kual lo remtihsak (in principle approval lo pek) hi kalphung pangngai a ni a, Dan hnuaia ram lak/hralh tura hmalak bultanna tak tak chu Preliminary Notification chhuah atangin a intan chauh a, chu chu 15.5.2025 ah ZPM sorkarin a ti chhuak a, ram lakna Dan dinglai nasa taka bawhchhe chung leh, Mizoramin inhung bikna dan kan neihte phei chu en kan vekin, a chak thei ang bera bawhzuiin rang takin ZPM sorkar hian a hralh fel a ni.
ZPM sorkar ding tir, cabinet meeting hmasa berah Lengpui Airport hralh turin thutlukna an siam nghal a, mipui dodalna avangin an hralh thei ta rih lo a, tuna Lengpui ram tho hmanhmawh tak leh hnawhsarum taka, Danin a phut ang pawha puangzar miah lova a ruka an buaipui leh ta chuk chuk hian Zoram hmangaihna thinlung aia sum ringawt an buaipui zawk zia a tifiah a. ZPM sorkar hmalak chhoh zel dan en hian, an kutah Zoram hi a him lo tak zet a, FCAA 2023 hman ve an duh ngawih ngawih chhan pawh an thiltih atangin a lo chiang chho ta zel a ni.
Lengpui ram hralh/acquisition chungchangah hian ZPM sorkar hotuten midang puhmawh tur dap a, sorkar hmasa lam a mite tih dik lohah puh an tum a nih chuan MNF chuan engtik lai pawhin lepse kan in huam a, CBI kuta General Consent pe anga an insawi ang ngeiin, CBI chhuitir hi an ngam ngei turah kan ngai a, an chhuitir lo anih chuan mantang eitu zingah an tel ngei a ni tihna a ni ang.
Issued by
Publicity Board, MNF General Hqrs., Aizawl, Mizoram.
