Thingtam avang hian District 11-a khaw 130 vel-a loneitu mi 4000 chuangte thlawhhma chu sazu puangin a tichhe nasa hle a. Thlawhhma lakna ram hectare 6869 chuanga hectare 1737 velah sazu hian buh leh thlai a seh a. Tai leh buhpui an seh nasat ber laiin vaimim, fu, behlawi, sawhthing, bawkbawn, hmarcha, mai, chhawhchhi leh fanghma te an tichhe tel bawk a. Sazu tur hi Bromadiolone leh Zinc Phosphide te an hmang ber a, chuti chungin district thenkhatah chuan duh khawp hman tur a awm lo.
Hei bakah hian sazu thahna atana Mizote'n an hman tlanglawn sairawkherh bakah thang chi hrang hrang vaithang, mangkhawng leh thangchep te hman a ni bawk a. Agriculture department hnathawkte chuan sazu-in an hriat theih loh na'n thang chi hrang hrangte hi hman thlak thin turin kuthnathawktute an zirtir a ni.
Agriculture Minister PC Vanlalruata chuan, Disaster Management & Rehabilitation Department-ah Thingtam avanga chhiatna leh tawrhna hi Mizoram chhunga chhiatna thleng bik (State Disaster Specific) a puang tura ngen a ni a. Hei hi tihpuitlin a nih chuan sazu puan avanga an buh leh bal leh thlai chantute hi tanpuina pek dan a awm theih a rinawm a ti.
