Lunglei-ah Police Commemoration Day 2025 hman a ni
Vawiin kha India ram puma ram leh hnam tana nun hlantu police martarte hriat rengna ni atana kum tina hman ṭhin, 'Police Commemoration Day' a ni a. Lunglei-ah chuan tukin zingkar khan Deputy Inspector General of Police (Southern Range) Altaf Ahmad Khan hovin Lunglei Luangmuala 2nd Battalion Mizoram Armed Police (MAP) hmunpuiah he ni pual hian hun hman a ni.
Lungleia Police Commemoration Day hmannaah hian DIG (SR) Altaf Ahmad Khan leh a staff-te, Lunglei District Superintendent of Police J. Lalmuankima leh a staff-te leh 2nd Bn MAP-a Commandant Francis Lalnuntluanga Ralte leh staff-te an tel a. September ni 1, 2024 leh August ni 31, 2025 inkara an duty laia nunna chan police 191 te sunna hun hmangin, anmahni zahna chibai an buk a ni.
He hunah hian DIG (SR) Altaf Ahmad Khan chuan hun hman chhan sawi fiahin, state hrang hranga police martar mi 191 te hming a chhiar chhuak a. Martarte zahna lantir nan Shok Parade neih niin, ram tana nun pete hriat rengna lungphun, 'Martyr Memorial'-ah sunna leh zahna pangpar dah a ni bawk.
Kum 2024 September - 2025 August (kum khat) chhung hian India ram pumah an duty laia nunna chan (martar) police mi 191 an awm a. Chu'ng zingah chuan a force malah Border Security Force (BSF) mi martar tam berin, mi 23 martar an awm a. State/Union Territory Police zingah Chhattisgarh chu martar tamna ber state niin, mi 16 an martar a. State/UT 26 leh Central Armed Police Force 8 aṭangin martar awmin, vanneihthlak takin Mizoramah erawh duty laia nunna chan an awm lo.
Police Commemoration Day hi kum 1959 October ni 21-a Ladakh Hot Springs hmuna China sipai kuta martar police 10 te hriat reng nan leh police martarte zahna chibai buk nan kum 1960 aṭang khan kum tin October ni 21-ah hman ṭhin a ni.
