Mapuia Chongthu hnenah Janjatiya Garima Utsav pualin "Tribal Unsung Heroes Award" hlan a ni
Lunglei, 2026 Nikir thla ni 16: Vawiin khan District Art & Culture Auditorium, Lunglei-ah hnam tana a hna thawh ṭhat avangin Mapuia Chongthu, Lunglei hnenah Janjatiya Garima Utsav Award, "Tribal Unsung Heroes Award" hlan a ni.
Mizoram sorkara Art & Culture (A&C) Department hnuaia Tribal Research Institute huaihawta Award hlanna hun buatsaih hi Lunglei District Art & Culture Office-a Senior Research Officer Lalmuanpuia chuan kaihruaiin, Award awmzia leh Pu Mapuia Chongthu hnena Award hlan chhan a sawi fiah a. Award hi Ministry of Tribal Affairs ai awhin Mapuia Chongthu kutah a hlan nghal bawk.
He Award hi India sawrkar Ministry of Tribal Affairs buatsaih Janjatiya Garima Utsav (Tribal Pride Festival) 2026 puala hlan a ni a. He Kut hun chhung hian ram chhung hmun hrang hrangah programme hrang hrang buatsaih niin, hnam tlem zawkte zinga mahni hnam leh ram tana hna thawk ṭhate chawimawi an ni.
Mapuia Chongthu pawh hi lemchan (film) siam lama a hna thawh ropui tak avangin he chawimawina hi hlan a ni a. He Award hian Trophy/Memento leh pawisa fai ₹10,000/- a keng tel.
