MGNREGA hming thlak avangin vai pathian hming lam tel a ngai dawn. NLUP ṭha leh changtlung zawk mipui tan chhawp chhuah kan tum.
Vawiin March ni 7, 2006 (Inrinni) zing khan Serchhip College peng-ah, MPCC Sr. Vice President Pu Lalnunmawia Chuaungo chuan, Central-a BJP sorkarin MGNREGA (Ni za inhlawhna) hming a thlak duh lohna lan tir naah thu sawiin, Central sorkarin MGNREGA hming thlaka vai pathian hming lam tel ngei ngei turin VB G RAM G (Ji Ram Ji) tiin an thlak a ni, a ti.
MPCC Sr. Vice President chuan, India ram hi Sakhaw tih bik neilo, Secular State a ni, kan ti ṭhin a. Nimahsela, BJP Sorkar hnuah Secular State kan nihna chu kan hloh tial tial a. Ni za inhlawhna hming thlak a, an vai pathian hming min lam tir hi Congress Party chuan a duhlo hle a. Central BJP te hian Ni za inhlawhna chu tidanglamin 'Ni 125 inhlawhna tur angin rawn sawi mah se, a theih dawn loh. Senso za a sawm (10%) hi State Sorkar tum tur a ni tawh a. Zaa za a nihlai pawhin ni 80 vel bak inhlawhna kan siam thei lo a. A nî ti tam mahse kan tlin dawn lo a. Thil ṭha tak anga lang, a taka ṭha silo a ni. A pawnlang a thlum a, a chhungril kha tak ang kha a ni, a ti bawk.
Pu Lalnunmawia Chuaungo chuan, Chhungkaw tam zawk ten eizawnna ngelnghet an neih theih nan NLUP kal tawh dan ennawn chungin kan buaipui leh dawn a. A famkim lo lai leh ṭhalo lai ngun takin kan zir chiang a, NLUP ṭha zawk leh changtlung zawk hi mipui tan chhawp chhuah kan tum a. Mizoramah Sorkar hnathawk chhungkua chu chhungkaw sing li chuang vel chauh an ni a. Chhungkaw tam zawk hi eizawnna mumal neilo an nih avangin an eizawnna tur bulṭan nana NLUP kalpui hi Congress Party in kan tih makmawh a ni. Health Care ṭha zawk, mipui nawlpui ban phakah private damdawiin ṭha kan hung dawn a. Thingtlang lamah Primary Health Care kan ngai pawimawh dawn a, PHC te kan ti changtlung dawn a ni, a ti bawk.
