ZPM sorkar chuan mipui te chiah pek dik taka kan hman avangin mipui an lawm. Forest Minister
Vawiin khan ZPM Ṭhalai General Headquarters buatsaihin Aizawl Municipal Corporation inthlan tur atan hmun hrang hrangah street campaign neih a ni. Heng street campaign naah hian, Forest Minister Lalthansanga (Chatea), Supply Minister B.Lalchhanzova bakah Adviser to CM TBC Lalvenchhunga, T. Lalhlimpuia MLA leh PB Lalsawmliana Secretary General ZPM General Headquarters ten thu sawiin street campaign neihna Ward -a ZPM Candidate ten thu sawina hun an nei bawk. Street Campaign hi Armed Veng, Chhinga Veng, Chawnpui, Ramrikawn leh Vaivakawn ah te an nei.
Minister Lalthansanga (Chatea) chuan, "ZPM Sawrkar hnuaiah chuan mipui ten kan chanvo diktak kan chang mek zela, sorkar pawhin kan beisei loh lamah malsawmna tam tak kan dawng bawk a. Sorkar hmasa lamah chuan mipui ten chiah pek kan hreh thin hle a,
ZPM sorkar ah erawh chuan mipuite chiah pek dik taka kan hman avangin mipui an lawm a. Electric bill mipuiin an pek pawh dik taka hman a nih avangin Rebate(lawmman) vbc.700 chuang Kan dawng tawh a. Road cess kan lak pawh dik taka hmangin, kawngpui tha zawk kan siam mek a. AMC ah kan lo sorkar a nih pawhin heng hi kan kalphung tur a ni a. AMC in chiah a lakte dik takin a hmanna turah kan hmang dawn a, mipui te tana tangkai turah kan hmang zel ang, chuvang chuan Aizawl mipui ten in vote hlu tak ZPM-ah pe turin in khawngaihna ka dil a ni." a ti
B.Lalchhanzova chuan "AMC hi mipui te phurrit thlentu tur ni loin khawpui nuam, him leh eizawn awlsamna, dan lalna hmun a ni tur a ni a, rethei ber te pawn an chanvo an chan theihna a ni tur a ni. AMC hi duhsak zawngte contract pekna ang tiat velah sorkar hmasa te khan an suih te zo vek a, Aizawl khawpuia cheng ten inpawh tlang taka ro an relhona tur a ni, a ti.
