Vawiin khan Mizo Hnam Run political session-ah MNF General Secretary Dr. Vanlaltanpuia chuan thu sawin, kan ram hruai mek tute hian democracy kalphung an kalpel nasa tawh lutuk a, mipuiin mak an ti hle a ni, a ti.
Dr. Vanlaltanpuia mipui zahlo hruaitute hi mipuiin leivung tharin an chhilh ve salh salh mek zel a ni, a ti a. Ka thian, ka batchmate tih mai maite hi Chief Minister ka atanga chhuakah chuan a level a hniam lutuk a. CM chuan ram leh mipui tana tha turah chuan tupawh be thei tura ngaih a ni zawk a. Kan sorkar hruaitute hian sawi awm leh awmlohte hre ve tawh rawh se, a ti a. Social media kaltlanga mipui au aw leh harsatna avanga rum ri hi hruaituten an bengkhawnin an hre tur a ni a, an ngaithla tur a ni. Hei hi democracy lungphum a ni, a ti bawk.
Dr. Tanpuia chuan, MPWD ten kawng enkawl an nei tam tawhlo niin a lang a. Hmun hrang hranga kawngpui pawimawh chhe lutuk hi PWD Minister mutthluk rei lutuk vang leh sorkar inthlahdah vang a ni a. Mizoram laili kawng pawimawhber, ATL road chu MNF sorkarin a ngaihsak hle a, an blacktop chhuak vek hman a. He kawng siam tura ZPM sorkar ruahmanna hi chhim mipui leh Zoram mipuiin kan thlir reng a. Tun dinhmunah inhmakhuana hmuh tur a awm lova. Working season kan neih reiloh thin avangin tun atanga ruahmanna felfai lo neihlawk a hun tawh hle a ni, a ti a. He kawng chhe lutuk avang hian chhim mipui leh Zoram mipui kan rum mek a ni tih hi he sorkar hian hre rawh se, a ti bawk.
Dr. Tanpuia chuan ZPM sorkar chu, VVIP visit tur inbuatsaihna hautak berah PM in Aizawl a lo thleng lo te kha, Lengpui leh Aizawl kawng hi he sorkar hian a enkawl/venghim zolo em ni, CBI consent pek tawh, thla 6 lek liam hnua sut a nih leh tak chhan pawh hi, talbuai an hlauh vang em ni, tiin a zawt bawk.
