Mizoram chu state ralmuang tak a nih thu chhuang takin kan sawi thei tawh ang. CM
Mizoramah hnam bil hel pawl an awm tawh lo nia hriat a ni.
Hmar Peoples' Convention Democratic, Lalhmingthanga Sanate Faction te chu an ralthuamte tunga nunphung pangai zawh turin an rawn kir a. Vawiin 30.4.2026 (Ningani) khan hemi puala program sorkarin a buatsaih chu Central Training Institute Parade Ground, Sesawng-ah Chief Minister Lalduhoma'n a hmanpui a. Speaker Lalbiakzama, Home Minister K. Sapdanga leh Minister, MP (LS), Deputy Speaker, Adviser to CM leh MLA eng emaw zatin an tel bawk.
Chief Minister chuan, Mizoram ralmuan thu kan sawi apianga kan rilru sira lo lang thin chu HPC (D) te an ni a. Anni nena inremna neih duhin inhawng takin kan indawr a. Kan Home Minister leh a thawhpuite an thawkrim hle a, an chungah lawmthu ka sawi a. Vawiin hi kan lo thleng ta a ni. Tunah chuan thinlung dam takin Mizoram chu state ralmuang tak a nih thu chhuang takin kan sawi thei tawh ang.
Remna hlutzia hi sawifiah thiam a har hle a. Mizorama remna leh muanna a awm theih nana ka kalsan takte leh ka thil chante ka ngaihtuah a. Nunna hlutziate, ralmuan nawmziate ka ngaihtuah a. Remna man hi a to a ni. Vawiina ralthuam dahtute kan ngaihlu che u a, mi huaisente chauh hi an tlawm ngam thin a. Chung mi huaisen chu in ni. Mizo mipuite chuan helna hi kan ramah a lo chhuah leh kan remti tawh lo a. Chutiang ur chhuak thei thil reng reng hi chu tuman i ching tawh lo ila, helna leh innghirnghona ti chhuak thei thil reng reng lakah kan zain inthiarfihlim ang u. Vawi khat tlin ve duh vang maia innghirnghona ti chhuak thei policy leh ngaihdan neih hi bansan ila, kan ramah remna leh muanna tluantling nei zui zel turin i tangrual ang u, tiin mipuite a sawm a ni.
Home Minister K. Sapdanga pawhin thu sawiin, vawiin hi Mizoram tana ni chhinchhiahtlak a ni a. Inrema nei tura rawn chhuak HPC (D) (LF) Cadre te kan lo lawm che u a. He inremna lo thlen theih chhan bulpui chu inremna duh kan Chief Minister Lalduhoma a ni a. Mizoramah remna a awm theih nana Central Service hna zahawm tawk tak bansantu kha a ni a. Vawiin thlengin remna a ngaihlu zui zel a, kan ram tan Remna Chhinchhiahna (Symbol of Peace) a tling a ni. Ram tana in rammut chhante ti hlawhtling turin state sorkar nen kan thawkho tawh dawn a, in nupui fanaute nen lungmuang takin awm ula, kan zain lungrual takin kan thawkho dawn nia, a ti.
Kum 1986 a Peace Accord ziah a nih khan Hmar hnamten an beisei a phak lova ngaiin HPC an din ta a. Kum 1994 ah Mizoram sorkar nen an ziak a, Sinlung Hills Development Council a ding ta a. He inremnaa dam thei lo mi thenkhatin HPC(D) a din leh a, chuta an hruaitu hmasa ber chu Lalhmingthanga Sanate hi a ni. HPC(D) H. Lalsangbera Faction lam chu sorkarin kum 2018 April thlaah inremna a neihpui a. Vawiina inremna a neihpui leh tak Lalhmingthanga Sanate Faction hi kum 2024 atang khan inbiakna neihpui lehin, tum li inbiakna neih a nih hnuah inremna ziak a lo ni ta a. He ti hian Mizoramah hnam bil hel pawl an awm tawh lo nia hriat a ni.
