BJP Mizoram chuan vawiin khan BJP Mizoram State Office, Mipui Rûn, Upper Republic-ah Friday Political Session an nei a. State President Dr. K. Beichhua leh Dampa bial by-election tur a BJP official candidate Lalhmingthanga ten thu an sawi.
Dr. K. Beichhua chuan, kan ramin politics ṭha a mamawh tawh hle a, Mizoram sorkar enkawltu hi tunge kan tih chuan, Central sorkar a ni a. Central sorkar chu PM Modi kaihhruai sorkar a ni a. Pu Modi-a hian India ram tana master plan ṭha tak tak a nei a, chung a master plan chu USA President hlui Barak Obama khan a lo hmu thiam daih tawh a, India ram hmasawn dan tur pawh a lo sawi dikin vawiin ah chuan khawvela Ram ṭhang chak leh Ropui zingah kan awm chho ta a ni, a ti a. India chuan ram hrang hrang thawhpui leh ṭhian ṭha ah a siam a, India ṭhian ṭha nih duhin ram tam tak pawh an awm mek a. Chutiang dinhmun kan nih mek lai chuan keini Mizoram hian eng vangin nge Pu Modi-a kan thawh pui theih loh, ram tam tak Kristian ram te'n Pu Modi-a thawhpui loh hlauvin an awm mek a, chuvangin vawiin ah hian Mizoram mipuite hi kan in enfiah a ngai a ni, a ti.
Dampa bial by-election camdidate Lalhmingthanga pawh in thu sawiin, Dampa Bial By-Election lo awm tur atan BJP chuan nasa takin hma kan la a, tun ah hian khaw ṭhenkhat-ah chuan BJP-in hma kan hruai mek a, Dampa Bial mipuite hian kan che vel hi an thlir reng tih a hriat hle a ni, a ti bawk.
