Mizoram sokarin State Healthcare Scheme changtlung zawk kan neih theihna turin, Asian Development Bank atanga loan assistance hmuh tuma rei tak hma a lak tawh chu tih puitlin niin, loan agreement sign fel a ni.
Hemi chungchang a vawiin-a Mizoram sorkar thuchhuah tarlan danin, Supporting Public Health Care System Strengthening To Achieve Universal Health Care For Mizoram atana ADB loan lakna tur chu, kumin January ni 23 khan ADB Headquarters, Manila-ah sign a ni a. India aiawhin Joint Secretary, Department of Economic Affairs, Ministry of Finance Baldeo Purusartha chuan a sign a, ADB aiawhin Country Director, Director, India Resident Mission Mio Oka chuan signin, Mizoram sorkar aiawhin Finance Secretary Ramchuana'n a hmuna kal loin e-mode in a sign ve bawk a, Loan ID L-4718 pek a ni.
Hemi atan a Mizoram sorkarin loan project a siam "Improvement of Mizoram State Health Care Scheme by enhancing the Corpus Fund” tih chu May ni 31, 2022 khan Ministry of Finance chuan a lo pawm tawh na a, harsatna hrang hrang avangin approve theih lohin a awm a, tun sorkar hian thar thawh lehin “Supporting Public Healthcare System Strengthening to Achieve Universal Health care for Mizoram” tiha thlak a ni.
Hemi hnu hian tih tur hrang hrangte tih a ni a, Ministry of Finance lama harsatna kan tawh loh nan Chief Minister leh Health Minister ten Union Finance Minister chu hmaichhan ngeia sawipuiin, D.O. letter te an pe tel nghal bawk a. Department of Expenditure, Ministry of Finance a zohnahthlak Secretary thar Vumlunmang Vualnam pawh hmai chhan-ah hmu in, theihtawp chhuahpui turin ngen a ni bawk.Tin, Finance Department lama kan hotute pawhin nasa taka bawhzuiin, Central Ministry-ah pawh zuk kal chilha nawr a ni.
Tichuan, rei tak buaipui a nih hnuah October ni 23, 2025 khan loan negotiation neih niin, ADB Board chuan December ni 5, 2025 khan loan chu a approve ta a. Loan approve a nih hnu hian thlasik chawlhin a zui avangin beisei anga hmaah loan agreement hi sign theih a ni lova, January ni 23 khan hybrid mode (a tak leh video mode tangkawp) in sign a ni ta chauh a ni.
Mizoram Universal Healthcare atana ADB atanga loan hmuh zat (loan component) hi USD 108 million niin, India pawisa chuan Rs. 800 crore a ni a. ADB loan pumpui hi Ministry of Finance hnuaia Externally Aided Projects hnuaia hmuh a nih avangin Government of India-in a rulh tur a ni. Government of India, Ministry of Finance in a rulhna tur interest rate hi SOFR (Secured Overnight Financing Rate) tih niin 3.6% per annum vel bawr ni tura chhût a ni a. Central sorkar hian loan pumpui atanga 90% hi grant angin Mizoram a pe ang a, 10% (Rs 80 crore) hi Mizoram sorkar hnenah loan anga Mizoramin a rulh ve turin a puktir chhawng dawn chauh dawn a. Mizoram sorkarin he 10% a rulh ve tur chin a rulhna tur interest rate hi Central sorkara Ministry of Finance in a la ruahman tur a ni a, State Development loan (OMB) ang vel tura beisei niin 7-8% interest vel tur a ni ang.
MUHCS atana ADB atanga sum puk hi thil danga hman tur a ni lo a, MUHCS Corpus Fund atan chauha hman tur a ni a. Loan amount atanga zaa sawmkua (90%) lai Government of India in a rulh dawn avangin, MUHCS atana State sorkar sum sen chu nasa takin a tlahniam dawn a ni.
