MJA General Headquarters chuan vawiin 3.10.2025 khan I&PR Director kalchhuak C. Lalnunkima thlahna leh Director thar K. Vanlalsangi lawmpuina an hlan.
Aizawl Press Club Conference Hall-a I&PR Director kalchhuak thlahna leh Director thar lawmpuina inkhawm hi MJA Treasurer Lalrinmawia Sailo-in a kaihruai a. MJA President C. Lalrambuatsaiha'n Director kalchhuak C. Lalnunkima hnenah ngaihhruaina thuziak leh Director thar K. Vanlalsangi hnenah lawmpuina thuziak a hlan a ni.
Inkhawmah hian MJA President C. Lalrambuatsaiha chuan, Sorkar hnathawk tam tak zingah an pension hun nghak chhuak zo lova thi engemawzat an awm karah C. Lalnunkima'n pension thlenga a hna tluang taka a thawk thei chu a lawmpui thu a sawi a, I&PR Director a nih chhunga MJA nen thawh hona tha tak an nei chu lawmaw a tih thu sawiin, a kal zelna turah duhsakna a hlan a. Director thar K. Vanlalsangi pawh a lawmpui thu leh ram rawng a bawl zelna turah duhsakna hlanin, ram leh khawtlang tan theihtawp chhuah turin a ngen a. Tunhma atanga I&PR leh MJA in thawh dunna tha tak an neih chu a kaihhruaina hnuaiah an chhawm nun zel a beisei tih a sawi.
I&PR Director kalchhuak C. Lalnunkima pawhin, MJA in a puala ngaihhruaina leh thlahna hun an buatsaih chu a lawmthu a sawi a, I&PR Department-ah kum 38 leh thla 10 a thawh chhung leh Director hna kum 3 leh a chanve a thawh chhunga MJA nen thawh hona tha tak an nei chu a lawmthu sawiin, Pathian malsawmna dawng Pension thleng a thawk thei chu malsawmna ropui tak a ni tih a sawi.
I&PR Director thar K. Vanlalsangi pawhin, Director mawhphurhna a lak chhungin MJA nen thawh dunna tha tak an neih a beisei tih a sawi a, thawh hona tha an neih loh chuan an chak thei dawn lo tih sawiin, a mawhphurhna hlenchhuak tura theihtawp chhuah a tum thu a sawi bawk.
