MNF-in Independence puan kum 60 lawmna an hmang dawn.
MNF Treasurer leh Mizoram Independence puan Diamond Jubilee Celebration Information & Publicity Sub-Committee Chairman Lalruatkima chuan, vawiin khan Aizawl Press Club-ah thuthar lakhawmtute kawmin, Zalenna sangber neih hi Mizote chanvo a ni' tih thupui hmangin, MNF-in Independence puan kum 60 lawmna an hmang dawn tih a sawi.
Lalruatkima chuan, Mahnia ro inrela zalenna famkim nei tura, March 1, 1966-a Independence puan chu kumin March 1, 2026 hian a kum 60-na alo tling der tawh mai a. He Independence puan kum 60-na, Diamond Jubilee hi MNF chuan ropui takin a lawm dawn a. Kum tluanin, programme hrang hrang hmangin a lawmna hi hman tum a ni. Diamond Jubilee lawmna thupui atan hian, 'Zalenna sangber neih hi Mizote chanvo a ni,' tih hman a ni ang, a ti.
Independence puan hriatreng leh mei mit lova chhawmnun reng hi Mizote kan tih tur a ni a, Hnam rilru putna atanga he mawhphurhna hi MNF chuan lain Mizo zawng zawngte lenna leh kimna turin Diamond Jubilee hi lawm a ni dawn a ni, a ti a. A ni tak, March 1, 2026 hi Pathian ni a nih avangin, a tuk ni 2, March 2026 hian hemi puala Organising Committee dinin a rel angin Vanapa Hall-ah hman a ni dawn a. He hunah hian Mizo Hnam thinlung pu zawng zawngte chu kal vek turin kan insawm a. Diamond Jubilee puala Lungphun hi Mizo Hnam Run kawtah phun a ni dawn a. Pu Zoramthanga, MNF President-in a hawng ang. Jubilee lawm kharna hun chu nakum March 1, 2027 ah hman tum a ni, a ti bawk.
