Vawiin khan ZPM Party chuan thuchhuah siamin, MNF-in mipui tana harsatna siam zawnga total bandh huaihawt an rel hi pawi kan ti a. Dampa bial by-election-ah an thatpui phah a rinawm loh an ti.
ZPM Party thuchhuah chuan, MNF NEM in tun thla ni 29-a Forest Conservation Amendment Act, 2023 adopt duhlohna lantir nan Mizoram pumah Total Bandh huaihawt an rel thlu ta mai hi mak kan ti a, ngaihtuah nawn a, sut leh ngei turin kan beisei a ni, an ti.
ZPM party chuan, Total bandh hi Dampa bial by-election boruak siam tumna mai ni a an hriat thu sawiin, vantlang harsatna thlen zawnga lungawilohna lantir tuma an rorelna sangin thu an vaw thla ta mai hi pawi kan ti a, politics hamṭhaṭna lak tum rana boruak siam tumna a ni tih mipuiin an hriat chian em avangin, mipui zah vang tal pawhin ṭhulh leh turin kan beisei a ni, an ti bawk.
FCAA, 2023 hi, Mizoram Legislative Assembly, MNF MLA-te telna Session-ah lungrual taka adopt a nih angin sawi nawi lova pawm ve mai turin kan beisei tiin ZPM party chua, FCAA, 2023 adopt tura House-a resolution pass a nih dawn khan, MNF MLA tumahin "Remti lo" an ti lo a, lungrual taka pass a ni a. Hei hi Forest Clearance lak kawnga kan ramin harsatna a tawh thin a lo zangkhai zawk nana Mizoram sorkar hmalakna a ni tih hi hlau lova pawm ngam turin kan beisei a ni, an ti.
ZPM party thuchhuah chuan, He Dan (FCAA 2023) hi kan sawi hlauhawm chiam avanga Mizoram leh mipui tana hlauhawm tur a ni lo tih sawiin, MNF hian Mizoram hralh tur ang hial leh Article 371G-a kan special safeguard hmang ngam lo ang hiala ZPM sorkar puh a, total bandh huaihawt an tum hi, dan inziak an chhiar thiam lo lui nge, mipui fuihpawrh an tum tih hi mi tam tak zawhna a ni, an ti a. Thu dik tawk lo hmanga mipui sawithaih te, vantlang nunphung dang chep zawnga khawsak te, politics hamṭhaṭna lak tum rana boruak ṭha lo siam te hi bansan turin kan ngen a ni, an ti.
ZPM chuan, Zoramthanga kaihhruai MNF sorkar-in Mizoram House, Ballygunge, Kolkata, Mizoram mipui hriat loha a ruk arala man tlawm taka an hralh nei let leh tura beitu kan Chief Minister Lalduhoma kaihhruaina hnuaiah Mizoram hi a him a ni tih lo hre turin kan chah a ni, an ti bawk..
