Rajya Sabha MP-in Traffic jam tih reh nan Flyover Bridge siam turin Sorkar Laipui a nge.
Vawiin-a Parliament Budget Session neih mekah Rajya Sabha MP K.Vanlalvena chuan thu sawiin, Aizawl khawpui Traffic Jam tih reh nan Flyover Bridge siamsak turin sorkar laipui a ngen.
Rajya Sabha MP hian, Aizawl khawpui chu tlangrama awm a nih avangin, kan kawngpui neih sate chu a zau tha tawk lo tih a sawi a. Hei hian traffic jam a siam nasat thu leh sorkar office kal te, zirlai leh zirtirtu ten a hun takah office leh school an thlen hman loh thin thu te a sawi chhuak a. Hei hian mipui nunphung a tikhaihlak a ni mai lo va, hmasawnna a tibahlah a ni tih thu K. Vanlalvena chuan a sawi bawk.
Sorkar Laipui hnuaia Housing and Urban Ministry chuan India ram khawpui tamtakah Flyover Bridges an siam tawh a. State hausa zawk khawpuiah te Union Urban Ministry in flyover bridge an siamsak theih chuan, State rethei zawk Mizoram khawpui Aizawlah pawh flyover bridge a siamsak ngei chu a beisei thu a sawi bawk.
