MUHCS atan July leh September inkar-ah finance department-in cheng vaibelchhe 35 pe chhuak.
Mizoram Universal Health Care Scheme (MUHCS) atan July leh September thla inkar-ah finance department-in cheng vaibelchhe 35 a pe chhuak.
MUHCS kalpuitu damdawi-in te’n he ruahmanna hnuaia inziaklut damlo an enkawlna senso phuhruk na’n July - September thla inkar khan Finance department chuan Mizoram State Healthcare Society (MSHCS) hnenah cheng vaibelchhe 35 a pechhuak a. Pawisa hi Mizoram chhunga MUHCS kalpuitu damdawi-inte hnenah an pe tawh.
MSHCS hotute chuan, July - September quarter atan khan Finance department-ah MUHCS kalpuitu damdawiinten damlo an enkawlna senso tura ruahman (proposal) cheng vaibelchhe 35 an thehluh thu an sawi a. Finance department hian cheng vaibelchhe 35 hi corpus fund atangin MSHCS hnenah July ni 15 khan cheng vaibelchhe 10 an pe a, August ni 4-ah vaibelchhe 15 leh September ni 23-ah vaibelchhe 10 an pe leh tih an sawi.
Cheng vaibelchhe 35 hi sorkar damdawiin 77 leh MUHCS kalpuitu empanelled mimal enkawl damdawi-in 20 bakah, emergency-a non-empanelled hospital-a in admit mi 699-te enkawlna senso atan an pek thu MSHCS hotute chuan an sawi a bawk.
MSHCS hotute chuan October - December quarter atan Finance department-ah proposal cheng vaibelchhe 60 an thehluh thu leh Finance department atang hian tun quarter atan pawisa dawn la nei lo mah se, buaipui mek a nih thu erawh an dawng tih an sawi a. Empanelled hospital-te hi khum an neih zat atangin pawisa an mamawh tur hi chhût a nih thu leh empanelled an awm belh chuan pawisa hi an la mamawh belh dawn thu an sawi bawk. (Thu lakna AIR Aizawl)
