MZP-in Sairang Rail Station-a hnamdang lo luh dan endika thuai dawn
MZP General Headquarters chuan kum 2025-2027 term-a, Executive meeting hmasa ber an nei a
Vawiin September ni 30, 2025 (Thawhlehni) khan, MZP General Headquarters, Aizawl chuan MZP Conference Hall-ah Executive Meeting vawi 647-na (2025-2027 term-ah vawi khat na) neiin an thukhawm.
MZP Executive Meeting chuan, Sairang rail station tlawh chungchang, Inner line Permit(ILP) check chungchang, Student Aid Fund siam chungchang leh Pawl chhung thil pawimawh hrang hrang a rel. Meeting hi President Dr. C. Lalremruata'n a kaihruai.
Executive Meeting chuan, Sairang Rail station-a hnamdang lo luh dan endika tlawh thuai nise tiin a rel a, ILP pawh Aizawl khawpui chhungah, hun remchang hmasa berah check nise tiin a rel a. ILP pek chhuah a nih dan leh ILP kan hman danah te thil fel tawk lo tam tak a awm niin meeting chuan an hria a, zirchianna neih ngei nise tiin a rel bawk.
