Naktuk-ah LADC Chairman thlang dawn.
Naktuka LADC Chairman thlan turah United Legislature Party atangin Congress Member, South Lungpher bialtu Pu C.Lalmuanthanga'n a hming a pelut a, he thu buatsaih thleng chuan hming pelut dang an awm lo.
Lai Autonomous District Council (LADC) a sorkar siam theih na’n Larsapin thupek a chhuah angin District Council & Minority Affairs (DC&MA) chuan Pathianni tlai khan hriattirna a chhuah a, United Legislature party hruaitu Pu C. Lalsawmzuala chu LADC a Chief Executive Member (CEM) atan January ni 22 atanga ruat a nih thu a tarlang a ni.
Naktuk January ni 28 hian protem-chairman kaihhruaina hnuai-ah Chairman thlan a ni ang a, a tuk January ni 29-ah Pu C. Lalsawmzuala hian thlawptu a ngah leh ngah loh fiahna a hmachhawn dawn a ni. Larsap thu ang hian naktukah hian pro-tem chairman atana ruat Pu C. Hrangthianga inkhawm a kaihruai dawn a, Chairman hi vawiin chawhnu dar 3 thleng chairman chuh turte tan hming pek luhna hun hawn a ni ang a, naktuk chawhma dar 10 leh a chanve-ah chairman thlan buatsaih a ni ang.
United Legislature Party ah hian MNF MDC 8 leh Congress MDC 7 an vaiin Member 15 an awm a. January ni 9 khan larsap hnenah LADC a sorkar an siam theih thu an lo thlen tawh a ni.
