New Mizoram siam hi kan tum bulpui ber a ni. BJP State Vice President
Vawiin February ni 23, 2026 khan BJP Mizoram chuan karthar inhlanna leh political session BJP State Office, Mipui Rûn (Upper Republic)-ah an nei a. State Vice President Vanupa Zathang in thu a sawi.
BJP State Vice President chuan, "BJP Mizoram chuan New Mizoram siam hi kan tum bulpui ber a ni a, Member tin te'n theih tâwp chhuaha New Mizoram kan thlen theih tir theih nan mawhphurhna kan nei a ni," a ti. Mizoram hi India ramah a ṭha zawnga hming lanna tam tak kan nei tih sawiin, BJP State Vice President chuan, India rama ziak leh chhiar thiam tamna state pawh kan ni a. Nimahsela vawiin ah hian pakhatna kan nihna hian ram ropui tak min thlen hleithei lova, Central Service-a inziak tling thei pawh kan vang tawh hle a, hei hian kan zirna in siam ṭhat a pawimawh zia a ti lang chiang hle a. Chumi kawngah chuan siam ṭhat tur a awm tih a chiang hle in a lang a ni", a ti bawk.
BJP State Vice President chuan, "BJP sawisel tute avangin kan buai phah tur a ni lova, Congress Party-te hian theih tâwp chhuahin thu dik tâwk lo hmangin min bei fo ṭhin a, nimahsela min sawiselna tur thar lam pakhat mah an nei tawh lova, a ṭhing an her lum vût vût reng a, mipui pawh hian kan ring tawh lo a. A chhan chu, dawt hmanga mipui min bum fo vang a ni, a ti a. Chuvangin keini hian India ram ṭhan ruala kan ṭhan ve theih nan, Mizoram mipui hma lam hun thlira beiseina sang tak neia kut hnathawk tu te'n an hah mila hlawh an hmuh theih nan a kailawn kan ni tih hi mipuite hian an hriat ngei ngei a ngai a ni," a ti bawk.
