P&E Minister hovin Mizoram sorkar leh Adani Group thawhho theih dan tur sawiho.
March ni 9, 2026 (Thawhtanni) tlai lam khan Power & Electricity Department Minister F. Rodingliana chuan a pisa-ah, P&E Department hotute nen Adani Group aiawhte kawmin, 460 MW thar chhuak thei tur Chhimtuipui (Kolodyne) Hydel Project khuah dan tur leh Mizorama power sector tihhmasawnna kawnga, Mizoram sorkar leh Adani Group thawhho theih dan tur an sawiho.
P&E Minister chuan Adani Group aiawha lo kalte chu lawmthu hrilhin, Mizoram Sorkar-in power intodelh a tumna kawngah thawhpui tur company tha a dap mek laia, India rama company lian leh rintlak ber zinga mi Adani Group-te’n Mizoram lam hawia hmalak duhna an nei chu lawmawm a tih thu a sawi a. Minister hian hydro power sector-ah Mizoram hian potential sang tak a neih thu sawiin, chu’ng hai chhuak tur chuan puihna a mamawh a, Adani Group-te an rawn lang ta chu phurawm a tih thu a lo hrilh a ni.
Sumit Verma, Vice President of Business Development - Hydro Pump Storage Project, Adani Group pawhin Mizoram Sorkar lo dawnsawnnaah lawmthu sawiin, tun hnaiah Adani Group chuan green energy development lamah nasa taka hma a lak thu leh he lama Mizoramin haichhuah tur a neihte haichhuahpui a, thawhhona tha tak an neih chhoh zel a beisei thu a sawi a. Project site-te a hmun ngeia tlawh tura lo kal an nih angin a hmun an kalchilh nghal dawn tih a sawi bawk a ni.
He inkawmnaah hian project site pahnih: Chhimtuipui (Kolodyne-II) Hydel Project ruahman mek leh Darzolui Pump Storage Project site-te chu Adani Group-te tlawh tura rel niin, March ni 10, 2026 atangin he’ng hmunhma tlawh hian an zinchhuak nghal dawn a ni.
