Pathianin remna min pek hi min ninhlei pek a ni lo. MNF President
Vawiin June 22, 2026 (Thawhtanni) khan Mizo Hnam Runah chhung inkhawm neih a ni a, MNF President Zoramthanga chuan thu sawiin, Mizoramin remna a neih chu Pathian pek a nih thu a sawi a. "Pathianin remna min pek hi min ninhlei pek a ni lo. Remna chanchin ṭha hril zel tur leh a chanchin ṭha kan hrilh zel theih nan Mizote hi Pathianin remna min pe a. Khawvelin remna hlutzia an hre zel a, MNF pawh remna thlen turin kan ṭangkai zia midangin an hre zel a ni," a ti.
Pu Zoramthanga chuan, MNF chungchang sawiin, "MNF hian a hranpain ropuina bik kan nei lo a, kan danglamna bik erawh chu Pathian leh kan ram tan titu kan nihna hi a ni. Chanchin ṭha hril turin he hnam Pathian tana buatsaih hi MNF tum ber a ni reng dawn a. Hniam chang nei ṭhin mah ila, Lalpa nghak tlattu leh Pathiana innghat tlat kan nihna hi a lang ṭhin a. Lalpan mi chawi sang leh ṭhin," a ti bawk.
"MNF Party chu sorkar leh turin a inbuatsaih leh mek a. Chumi atan chuan a ṭul ang angte buaipui chhoh mek zel a ni. MNF-ah nghet takin, Pathian ring chungin i awm zel ang u," a ti. MNF president chuan tunhnaia Delhi a zin report a pe a. Union Home Minister Amit Shah leh mi pawimawh tak tak a hmuh thu sawiin, ṭha takin an inkawm, tih a sawi bawk.
