PM Rally-ah 2 Mizo Battalion NCC cadet-te an tel.
Lunglei-a din thar, 2 Mizo Battalion National Cadet Corps (NCC) atanga cadet 8-te chuan January 2026 khan New Delhi-a Special National Integration Camp (SNIC) neihnaa Republic Day Parade Contingent-ah telin, Prime Minister's Rally-ah cheraw an kan a ni.
Hei hi Mizoram chhim lam atanga NCC cadet-te Prime Minister's Rally-a an tel vawi khatna a ni a. Lunglei district tan leh Mizoram tana mellung chhinchhiahtlak a ni. Cadet-te hi unit din thar atanga thlanchhuah ni mah se an mawhphurhna tha takin an hlenchhuak thei a. An chanvo hi chawpchilh angreng taka hriattir an ni chung pawhin tha takin an ti thei a ni. Inpuahchahna hun nei tlem hle mah se an inthurualin an inthunun tha a, an hnamzia zahawm takin an phochhuak bawk a, ram pum hmuha an thiam thil zei tak leh thatho taka an pho lang thei hi fak an hlawh hle a ni.
He an hlawhtlinna avang hian Mizoram Larsap chuan cadet 8-te hi March ni 3, 2026-ah an inpekna, inthununna leh Mizoram hmingthatnaa an thawhhlawkna avangin chawimawina a hlan dawn a ni.
Col Sagar K Mohanty, Commanding Officer, 2 Battalion NCC chuan thu sawiin, "He hlawhtlinna hriatrengtlak hi a huhova thawhrimna leh inpekna nghet tak rah a ni. Zirtirtute leh zirna inte kaihhruaina leh thlawpna ka fak a. A bik takin, Cadet Joel V. L. Hruaitluanga, Cadet Allemande, Cadet C. Lalruathlua, Cadet HC Lalvohbika, Cadet Samuel V. L. Pekhlua, Cadet Lalhimpuii, Cadet C. Lallawmkimi, leh Cadet F. Lalhriatpuii te tha taka an thiam thil an phochhuah avang leh an inthunun that avangin ka lawm a. Inhriattirlawkna hun tlem mah se cadet-te hian thawhhona tha, inrintawkna leh hnam chawisanna lantirin, NCC thurin bul an kengkawh a ni," a ti.
He hlawhtlinna chhinchhiahtlak hian Mizo thalaite theihna sanzia leh NCC unit din tharte thatzia a lantir a. Hei hian Mizoram dung leh vanga thalaite chu NCC zawm a, ram hmasawnna leh inpumkhatna atana awmze nei taka tha thawh tura a chawh phur ngei beisei a ni.
