Department hrang hrang te in sak, kawng siam leh lei dawh an endik thin-ah, quality tha lo a la tam. Er. Vanlalneiha
Vawiin Ni 16.3.2026 khan ZPM Party chuan an party office – ah chhung inkhawm an nei a. Er. Vanlalneiha Ralte, Consultant leh Mizoram State Project Monitoring Committee (MSPMC) member ni bawk chuan thu a sawi.
Er. Vanlalneiha chuan MSPMC hma lak dan sawiin, “Mizoram Sawrkar thar a pian atanga rei lo te, January ni 23, 2024 khan MSPMC din a ni a. Hei hi tunhma lama kan la neih ngai loh a ni a, department hrang hrang te in sak, kawng siam leh lei dawh te an endik thin a ni, a ti.
Vaibelchhe tam tak sum sen ralna hna thawh a tam hle a. Amaherawhchu, heng hnate hi zawh an nih hnuah a project lo awm chhan ang ngeia engtiang taka tangkaia hman nge an nih leh ekawl zui an nih dante hi chhui chian dawl lo a tam hle, a ti a. Hna endik zinga tam tak hi chu a zawh hun chhung tur bituka zawh a awm meuh lo a. Hun pek belh, vawi hnih vawi thum, vawi li leh aia tam, hun pek let aia tam pek belh ngai khawpa hna thawh muang leh ngaihsak loh an ni. Chuti chung chuan quality tha lo a la tam viau bawk,” a ti a.
MSPMC member ni bawk Pu Maneiha chuan, “MSPMC hian project lian tak tak te hi a nih dan tur ang taka tihpuitlin a nih theihna tura vil leh enpui hi a tum ber a ni. January, 2024 atanga March, 2025 chhungin Project hrang hrang, District 10 ami 47 tlawh leh endik a ni. Heng project te hi kum 4/5 vel a hna lo tan tawh te, la zawh loh te an ni tlangpui. Kum 2024-2025 Annual reports siam niin, hemi hun chhunga projects inspection neih zat hi 47 (department 13 hna thawh) a ni a. Inspection nei tura fehchhuah zat hi vawi 48 a ni, a ti.
Heng bakah hian state project ni lo, specific assignment-a kal chhuah vawi 5 kan nei bawk. MSPMC Annual Report (2024-2025) hi February 24, 2026 khan Assembly Budget Session-ah kan Chief Minister zahawm tak, Committee Chairman ni bawkin House-ah a lay a, House property pakhat a lo ni ta hi thil la thleng ngai lo a ni,” tiin, mipui lam pawhin MSPMC pawimawhna hriaa kan tawiawm that hle a tul thu a sawi bawk.
