Saipum ram-a Assam ho LO VAH ni a sawi Kolasib DC leh SP ten enfiah. |
Tunhnaia social media-a Assam lam mi ṭhenkhatin Saipum ram chhunga lo vata hma an la nia thehdarh a nih chungchang bawhzuiin, March ni 11, 2026 khan Kolasib Bawrhsap, Robert C. Lalhmangaiha leh Senior SP Lalrinpuia Varte ten Saipum khua hi tlawhin, he harsatna thleng chungchangah hian Saipum khawtlang hruaitute nen thil awmdan an sawiho.
Saipum khawtlang hruaitute sawi danin, hnamdang ten lo vah nana hmun an rawn ruahman hi a hma chuan Mizoram sorkar hnuaia Police-te duty-na ṭhin, Chawilung Camp awmna hmun a nih thu an sawi a. Kawng chhiat avanga he hmuna Police duty-te an awm theih tak loh hnu ah, venhimna hna a lo chak tawk ta lo chu remchangah lain, Assam lam aṭang hian an rawn zuam ta niin an ngaih thu an sawi bawk.
Kolasib Bawrhsap chuan he thil thleng hi sorkar pawhin a ngaimawh hle tih sawiin, buaina leh inepna chhuak lova boruak muanawm tak hnuaia chinfel a nih theih dan kawng zawn chu thil ṭul hmasa a nih thu a sawi a, a ṭul ang zela hma la turin sorkar a inhuam thu khawtlang hruaitute hi a hrilh nghal a ni.
Saipum khawtlang hruaitute chuan he hmun hi an pual ram, Saipum ram ngei a nih thu uar takin an sawi a, Assam lam aṭanga he hmalakna hi an kalpui tlang zel a nih chuan, nakin zelah ramri buaina lian zawk a chhuah theih dawn thu an thlen a. Sorkar chu a hma thei ang bera hma la turin an ngen a, remna leh muanna nena he harsatna chinfel a nih theih dan tur kawng hrang hrang an sawiho nghal bawk.
