Sorkar document lem hmanga sikul chawlh puanna siamtu man a ni.
April ni 27, 2026(Thawhtanni) khan Office Memorandum lem pakhat (Office Memorandum No. F-23012/36/2025-ESTT-CSD, ni 27 April 2026), General Administration Department-in ruah sur nasat avanga sorkar chawlh a puanna ni awm tak chu, Social Media hrang hrang-ah thehdarh niin, mipuite tan buaina nasa tak a thlen phah a. He Office Memorandum lem siamtu hi rang takin police ten an man.
He document lem-ah hian Irene Zohlimpuii Chongthu, Additional Secretary, GAD hming chuangin, Ch. Lalnunkima, Deputy Secretary, GAD-in digital signature-in a sign hnan angin a lang a. Hemi chungchang-ah hian Christina Lalmuanzuali, Under Secretary, General Administration Department, Aizawl District chuan Cyber Crime Police Station-ah dan anga hma la tura ngenin FIR a theh lut a.
A ngenna angin CCPS Case No. 17/26 dt 27.04.2026 u/s 336(3)/353(1)(b) BNS 2023 chu ziah luh nghal niin, rang taka chhui zui nghal a ni a. Document lem siamtu Lalramhlua (kum 18), s/o Michael Lalramchhana, Upper Republic, Aizawl man a ni.
Sorkar document siam danglam leh siam chawp-a theh darh hi dan kalh a ni a. Hetiang lakah hian mipuite fimkhur a tul hle a. Hetiang kawnga inhnamhnawih te chungah dan anga na taka hma lak zel a ni dawn a. Mizoram Police chuan mipuite chu social media (Facebook, Instagram, Whatsapp etc) hmanga kan thil thawn darhah fimkhur lehzual turin leh thudik finfiah hmasa thin turin a ngen bawk a ni.
