Ki Vawiin khan MPCC Communication Department chuan thuchhuah siamin, ZPM sorkar chu an intiamna ang ngei in Electric Bill pung hi tihniam rawh se an ti.
MPCV chuan, Mizoram hmun hrang hrang atanga report an dawn danin, Electric Bill a pung nasa hle niin an sawi a. Thlakhata cheng 600 chawi ṭhin ten tunah chuan cheng 7,000 bawr velte chawiin, cheng sangkhat pawh chawi tlinh ngailoten cheng sing chuangte an chawi ta mai chu MPCC chuan pawi a tiin a ngai thu tak hle a ni, an ti.
MPCC chuan, ZPM ten an Manifesto ah Electric Bill an tihsan ve loh tur thu a ziah bakah, thla hmasa mai January ni 12, 2026 (Thawhṭanni) a ZPM Office hawnna inkhawmah Chief Minister Lalduhoma chuan, kumtinin Electric Bill hi a pung ṭhin a. Sorkar liam taah Unit khat man chu ₹5.83 a ni a. Hei hi kan chhawm a. Kum 5 chhungin keini chuan Electric Bill hi kan tipung ve dawn lo a ni, tiin a sawi an ti a. Tunah hian mipui rawka Sorkar sum tuakna atan Electric Bill chu ZPM Sorkarin a tisang ta vak mai hi a pawiin an intiamna ang leh CM Lalduhoma sawi ang ngeiin Unit khata ₹5.83 a Bill siam ṭha leh turin MPCC chuan ZPM Sorkar a hriattir a ni, an ti bawk.
MPCC chuan, ,ZPM Sorkar hnuaia Electric chhit man sang chak ta lutuk chu a ṭul angin an zir chiang zel dawn tih an sawi a. MPCC ngenna leh hriattirna ngaipawimawh lova ZPM Sorkarin Electric Bill a tisang lui a nih chuan, mipuite thlavang hauh turin a tawp thlengin MPCC chu a che chhuak dawn a ni, an ti bawk.
