Vawiin 3.10.2025 khan MPCC President Lal Thanzara chuan Congress Bhavan-ah thu sawiin, kan ram, kan hnam, kan sakhua tana hlauhawm BJP chungchang hi sawi tam tawk a awm thei lo a ti.
Lal Thanzara chuan, RSS kum 100 tlin lawm nan PM Modi an Cheng 100 thir a tlangzarh-ah, Hindu pathiannu "Bharat Mata" bakah RSS volunteer-te kum 1963 Republic Day parade tarlan a ni hi a demawm takzet a ti a. RSS te hi India zalenna sual nan a thawh nei lo, British-te thlawp zawk tu an ni a. Rs.100 thir hi thiam taka RSS tena India ram Hindu Lalrama siam an tumna kal zel a ni a. He Bharat Mata hi 1905 kumah khan RSS mi leh sa Abindranath Tagore ziah a ni a, Hindu pathian nu lem a ni, a ti.
MPCC President chuan, he cheng 100 thir tangka hi Biak In kan inkhawmnaah thawhlawmah kan la hmang dawn tih sawiin, BJP te hian an ti nghal phut phut dawn lo a, muangchangin Hindu Sakhua-ah hian min um luh vek an tum a. Keini Mizo Kristian-te hian kan sakhuana ti dal khawpin development sum te hi a thleng nan kan phal lo a ni, a ti bawk.
Lal Thanzara chuan, ZPM party hian NLUP kha term tawp dawn a vote zawn nana hmang angin an tlangthantir a. NLUP leh SEDP te hi a inthlau lutuk a, tehkhin chi a ni lo tih lo hre turin ka chah a ni, a ti a. NLUP fak em emtu, nimahsela, a awmna apianga thusawi dang leh thin CM kan nei hi a vanduaithlak hle a ni tih ZPM unaute hian lo hre turin ka chah duh bawk a. NLUP hmalaknaa kan hlawhtlinna an hre duh a nih chuan 'Hmasawnna Lamtluang' tih lehkhabu kan nei vek a, hengte hi lo en ve turin kan duh a ni, a ti bawk.
MPCC President chuan, tunah hian Mizorama Sport Association hrang hrangte, Sport Minister chungah an vui hle a. Pathian leh mipuite zara Congress kan sorkar leh a nih chuan, Sport infrastructure kan neihte hi a enkawl hna Sport Association hrang hrang hnenah kan hlan leh dawn a ni, a ti bawk.
