SSC hnuaia hna lak BSF Constable (GD)-ah Mizoram Certificate lem hmangin hnamdang 8 an tling.
Vawiin khan Aizawl Press Club-ah MSU hruaitu ten thuthar lakhawmtute kawmin, Staff Selection Commission (SSC) chuan kum 2024 khan Border Security Force (BSF) hnuaiah Constable GD, (General Duty) tur lakna examination a buatsaih a. He examination-ah hian Mizoram state quota-a mi 10 lak zingah mi 8 chu Mizo ni lo leh Mizoram mi ni lo an ni, an ti a. Mizo ni lo pariat lak te chu
1. Anurag Yadav S/o Lallan Yadav
Mualveng, Tlangnuam, Aizawl
2. Amarjeet Yadav S/o Abay Narayan Yadav
Mualveng, Tlangnuam, Aizawl
3. Rahul Prajapati S/o Uday Shankar Prajapati
Mualveng, Tlangnuam, Aizawl
4. Sumit Kumar S/o Uday Vir Singh
Mualveng, Tlangnuam, Aizawl
5. Divyansh Pandey S/o PT Desh Bhakt Ranjan
Mualveng, Tlangnuam, Aizawl
6. Indresh Pratab S/o Dinesh Singh Yadav
Chilui, Mamit District
7. Shilendra Singh S/o Chandrapal Singh
Phaizau, Mamit District
8. Dinesh Kumar S/o Mukesh Singh
Chilui, Mamit District inti te an ni, an ti.
MSU hruaitute sawi danin, Heng mi pariat te hian DC Aizawl leh DC Mamit atanga lakchhuah ni awm tak Residential Certificate an nei vek a. Amaherawhchu, an Residential Certificate hi Ministry of Home Affairs, Subsidiary Training Centre, Border Security Force, Indore chuan verification ti turin Aizawl DC leh Mamit DC te chu July ni 19, 2025 khan a rawn hriattir a. He verification ti tura an hriattirna leh DC ten an chhanletna hi RTI hmangin MSU chuan a dil chhuak a. Aizawl DC hian August ni 4, 2025 khan chhanna thawn letin, heng mite Residential Certificate hi a lem a nih thu an hriattir a. Mamit DC pawhin September ni 1, 2025 khan chhanna thawn letin, heng mite Residential Certificate hi a lem a nih thu leh certificate issue tu hming anga tar lan, Lalhmingliana, SDC tih chu hetih hunlai hian hetiang mi an awm loh thu an hriattir bawk a ni.
Heti chung hian heng mite hian January ni 10, 2025-a training an zawm chu an chhunzawm zel tho a, January ni 24, 2026 khan training chu zovin, Jammu leh Kashmir lamah post vek an ni. MSU chuan he thil thlengah hian FIR an thehlut dawn, a tawp thlenga bawkzui an tum thu an sawi bawk. (A aia kimchang naktuk chanchinbu-ah)
