Tawngkam thiam vang leh sawi mam thiam avangin thil man a hniam phah lo. Dr. Thangtea
AMC Election campaign-a feh chhuak mek MNF Senior Vice President Dr. R.Lalthangliana MLA chuan vawiin(Ningani) khan MNF AMC Ward No-10, Zotlang leh Ward No-7, Thuampui te tlawhin campaign office a hawng.
Dr. Thangtea chuan thu sawiin, ZPM sorkarin a let thawka ration buhfai man a tihsan hi AMC area-ah pawh tuartu chhungkua an tam thu te, tui bill, electric bill leh chhiah chi hrang hrang a let thawk te, hmun thenkhatah a let thum/let li laia an tihsan chu mipuiin kan tawrh hle thu a sawi a. Chief Minister leh Minister/MLA-ten an tawngkam thiam leh an sawi mam thiam vang ringawtin mipui chhiah pek a tlem phah lo tiin, a tuartu leh hre chiangtu chu mipui an nih thu a sawi. "Tawngkam thiam vang leh sawi mam thiam avangin thil man a hniam phah lova, bill leh chhiah kan chawi leh pek a tlem phah lova, sum leng vak a tam phah hek lo," a ti.
Dr.R.Lalthangliana chuan Mizoramah chuan AMC area-a chengte hi politics ngaihven lo pawha khawsa theite awm tamna hmun a ni a, buhfai, ei leh bar, tui, electric, Gas leh kawng leh a that a, ei bar kan hnianghnar chuan sorkar thaah kan ngai mai a, mipui kan lungawi mai thin tih sawiin, hengah te hian ZPM sorkar a hlawhchham fai vek a ti. Chuvangin, Aizawl khawpui enkawl turin ZPM an tlak loh thu sawiin, Aizawl khawpui hmangaih bertu MNF candidate-te thlangtling turin mipui khawngaih vote a dil bawk.
