MNF Senior Vice President Dr. R.Lalthangliana, Dampa bial by-election a MNF official candidate chuan October ni 3, 2025 (Zirtawpni) hian Reiek, W.Lungdar, Khawrihnim, Hreichuk, Lungphun, Kanghmun, Bawlte, Darlung, S.Sabual leh Bawngthah-ah hun a hmang.
Dr.Thangtea chuan tun tum inthlan chu tum dang inthlan ang ni lovin, a boruak a danglam bik riau thu a sawi a. Keimah-ah hian chhuan tur engmah a awm lo a, ka nau Rintluanga Sailo boral avangin loh theih lohin inthlan a ngai ta si a, chumi hmun ruak luah khat tur leh, a thawh mêkte chhunzawm turin, a hmabak la awmte tipuitling tur te, kan mittui tlak mekna hruhul turin MNF party chauh ni lo, party dang zawng zawng leh bial mipui zawng zawngte khawngaih vote ka rawn dil takzet che u a ni, a ti.
MNF Sr. Vice President chuan, politics-a kum 39 zet a lo awm tawh thu leh a hun chawhnu lam hmang tan ve tawhah a inngaih thu a sawi. He tih chhung hian famkimlohna khawvel anih angin hun kal tawhah a hriat loh avanga mi rilru a lo tihnat tawhte a awm a nih chuan ngaihdam a dil a. Dampa bialah hian thlantlin a nih chuan, Dampa bial tan leh Zoram pum tan a theihna zawng zawnga thawk tura a in pumpek thu a sawi.
Dr.Thangtea hian Dampa bial khaw hrang hrang a fannaah mipuiin Zoram khawvel politics an lo ngaihven em em leh bial hmasawnna tur an lo ngaihtuah hle chu fakawm a tih thu a sawi a. Amah tha taka an lo dawngsawng zel chu lawmawm a tih thu a sawi bawk.
MNF Sr. Vice President chuan, Upper Primary School Hreichuk chu tlawh pahin, Education-ah Minister niin kum 8 ka lo enkawl tawh a, SSA pawh ka hun laia bultan a ni a, kha tih lai khan he school hi SSA atanga kan bultan kha a ni, a ti a. SSA kha tunah chuan Samagra tih a ni tawh thung a. Sikul hotuten mamawh hrang hrang an sawi chu a ngaihthlaksak bawk.
