Vawiin ni 26.5.2026 khan MNF Party chuan thuchhuah siamin, Tourism Director chungchang ngaihtuah fel vat ni rawh se an ti.
MNF Party thuchhuah chuan, Mizo Zirlai Pawl (MZP) te’n Tourism Director charge la tura sorkar aṭanga pension tawh, Pi Lalrodingi rawih nawn tumna chu an dodal a. Pi Lalrodingi rawih nawn tumna chungchangah hi Chief Minister Pu Lalduhoma nen pawh MZP te hian sawihona neiin an lo inbe tawh a. Chief Minister nena an inbiakna-a an thu dah ang ni lo vin; sorkar chuan Tourism Director charge la tura tihna order chu May ni 22-ah a chhuah ta a!
Zirlai pawl lungawi loin Directorate of Tourism-a thawktu zawng zawngte chu ni hnih chhung an Pisa kai tur dang ta a, hetianga hnathawk thei loa staff zawng zawng an awm ta hi MNF chuan pawi a ti a. Hna thawh tur tam tak tih khaihlaka a awm te, anmahni dawrtu tur mipui te tan pawha rokhawlhna a awm ta te leh, harsatna dang lian zawk a thlen hmain a rang lama he buaina hi chingfel thuai turin MNF chuan sorkar a phut a.
Pi Lalrodingi hi Additional Director, Commerce & Industries Department aṭangin April 2026-ah supernuation-in a pension a. OSD to Chief Minister atana ruat a ni a, hemi chungchangah hi chuan MZP te hian an dodal lo a, mipui pawhin an hrethiam niin a lang a, Chief Minister-in a thuneihna hmangin a ruat a ni ve mai a ni. A pension hnua Tourism Director mawhphurhna pawimawh em em chelh kawp tir a, Secretary Government of Mizoram status pek belh a la ni ta cheu mai erawh hi chu MNF chuan mak a ti a. MZP te’n an dodalna chung leh mipui lam pawhin mak an tih em emna kârah in-rawih zui dan hram sorkar hian a zawng niin a lang a.
Sorkar kalphung pangngai-ah chuan Tourism Department-a Joint Director ni mek hi Director puitling la qualify lo pawh ni se, charge lak tir mai tur a ni a. Tin, Department Secretary pawhin Director hi a kawp thei tho bawk. Hei hi, tun dinhmunah Mizoram sorkar hnuaiah Department ṭhenkhata an kal mek dan pawh a ni. Chutiang a nih loh pawhin Civil Service MCS/IAS emaw dah lailawk mai theih a ni bawk. Tuna sorkar kal dan en hi chuan MZP te duh loh leh ngaihṭhat lohna hi MNF chuan a pawmpuiin a thlâwp tlat a. Mimal induhsakna hleihluak tak, mimal inkara inlaichin biknaah hian thil fello lianpui a awm em ni tih pawh MNF chuan sorkar a zawt a ni, an ti bawk.
