Tourism Minister leh Sorkar Laipui Tourism Secretary in Mizoram Tourism hmasawnna an sawi dun.
5.5.2026 : New Delhi-a cham mek Tourism Minister Lalnghinglova Hmar leh Bhuvnesh Kumar, Secretary to Government of India, Tourism -te chu vawiin chawhma khan New Delhi-ah an inkawm a, Mizoram Tourism hmasawnna an sawi dun.
Tourism Minister Lalnghinglova Hmar chuan tun hnaiah Mizoramah khualzin an pun mek thu te, chumi lo dawngsawng tura inbuatsaihna leh inzirtirna (capacity building & awareness campaign) ṭha zawk kalpui a ṭul thu te, Mizo khawtlang nun pawlh dal loa khualzin dawnsawn theih nana Mizoram sorkar ruahmanna leh hmathlir neihte a sawi a, sorkar laipui nen he mi kawnga thawhho theih dan tura rawtna a neihte a sawi.
Tourism Minister chuan, "Mizoram chu khualzin tlawh châkawma siam piah lamah khualzinte châm rei theihna hmun ni se kan duh. Hei vang hian an lo thlen hlima Aizawl khawpui leh a chhehvela hun rei zawk an hman theih dan leh, chuta ṭanga Mizoram hmun danga an zin chhuah dan ruahmanna kan siam chho mek," tiin Aizawl khawpui chhehvel khualzin hipna hmuna chei dan turte a sawi.
Tourism Secretary Bhuvnesh Kumar chuan tun hnai maiah Aizawl leh Thenzawl a tlawh thu te, khualzin hip tura theihna a neih san dante a sawi rualin, "Aizawl aṭanga ban phak maiah khualzin hipa thil lian tham din hi a ṭul takzet a ni," a ti a; sorkar laipui hmachhawp "One State: One Global Destination" project chu khualzin luh tamna ber, riahna leh ei leh in lamna remchang tamna ber Aizawl aṭanga ban phaka duan ṭha a tih thu a sawi.
Lalnghinglova Hmar chuan 'Winter Capital of India' nih tuma hmalakna a awm mek thu leh, a ṭul anga sorkar laipui puihna an mamawh dante a sawi a, Bhuvnesh Kumar chuan hun bik tinzawn neia khualzin hip tum chu thil ṭha leh finthlak tak a nih thu sawiin a office aṭanga a thlawp tlat tur thu a sawi.
