Tun hnai ruah sur in hmun hrang hrang-ah harsatna a then mek
Tun ni 2 lo awm turah khua a la cheng thei a, hmun thenkhatah chuan nasa taka ruah sur thei leh leimin tenau pawh thleng thei a la ni.
Nimin Thawhlehni atang khan ruah a la tlak chhunzawm zel avangin, nizan khan hmun hranghrang atanga Lunglei panna kawng min leh chim a awm a. Tlawng Lei leh Pukpui inkar a min chu darkar 1 dawn thenfai hnuah a tlang a. NHIDCL kawnglaih avanga Theiriat area a NH 302 min chuan lirthei ṭhahnem tak dangin, Zobawk, Lungpuizawl leh chhim lam zawng kal pawh theih lovin a awm a, khualzin tangkhang engemawzat bakah hnamdang driver te an awm a ni. Theiriat YMA chuan nizan khan riahna leh eitur an ruahman sak a ni, damlo zawn ngai te tlawmngaiin an zawn a, leimin avanga harsatna thleng mek-ah hian YMA in theihtawp chhuahin hma an la a. Leimin na hmun hi tumdangah pawh a minna reng thin a ni a, ruah a tlak reng avangin thenfai ngaihna a awm rih lo a ni.
Hetihlai vek hian kum kalta lama Bualte leh Thualthu inkar a leiminna thin pawh nasa takin a min leh a, Lawngtlai leh Siaha lam chu kalpawh theih ala ni rih lo a. Ruah a la tlak reng avangin thenfai ha hi tawh theih ala nilo a. Bualte leh Thualthu khua-ah khualzin tangkhang engmawzat an awm a, an ni hi khawtlangin a lo buaipui a ni.
DM&R hotute chuan Mizoramin furpui a hmachhawn mek avang leh Mizoram chu tlangram, leimin duhna hmun a nih avangin mitin te kan tuichhe paihna theuh uluk taka enfiah a, tihfai ngai leh thawm that ngai te tifai a thawm tha theuh turin an ngen a, midangte tana harsatna siam lova tui luantir a veng chhunga chhiatna thleng thei tur hlauhawm a awm leh awm loh chungchangah pawh beng chhi theuh tur leh chhiatna engpawh thelng se, thuneitute hnena a rang thei ang bera report thin mitin an ngen a ni.
Hetihmek lai hian Tlabung-a Khawthlang Tuipui lian mek chuan mihring chenna in thenkhat a chim teuh tawh hle a, tui hi alian zel a nih chuan in tam tak chim thei dinhmunah an ding mek a. Aizawl-ah pawh Ngaizel phei leh Chanmari to Bawngkawn kawng chu kopang chimin in a hnawh mek bawk a, thenfai hna thawh zawh a nih hma chuan lirthei eng chi mah in an zawh phal a ni lo a ni.
