Vawiin khan Dampa bial by-election neih tura khaw hrang hranga fang mek MPCC official candidate John Rotluangliana chuan, Saithah, Phuldungsei, Parvatui leh Lallen te a tlawh.
John Rotluangliana chuan khaw hrang hrang-ah hian thu sawiin, ZPM Candidate Vanlalsailova hi Congress tan a hnawk miah lo a. A tan hian ZPM party hi hling an ni a. Chutiangin MNF party pawh tun hnaiah Zoramthanga a hlim thar lutuk chuan Headquarters leh Dampa biala an Candidate Dr. R. Lalthangliana leh an party nasa takin a ti hnual a. ZPM leh MNF party leader Lalduhoma leh Zoramthanga hi by-election leh kum 2028 MLA inthlanpui atana Congress Party Star Campaigner an ni a. An ni pahnih hi an dam that kan duhsak takzet a. Tluang taka Zoram pum tlawha an zin theih phawt chuan chiang takin kum 2028-ah Congress kan sorkar ang, a ti bawk.
