Zalena suala rammu tawhte inhmukhawm. Kan theihna zawng zawngin Zoram zalenna nan kan thawk. Tawnluia Ex- Army Chief
Vawiin khan Zoramin zalenna a sual laia hnam sipaia lo ṭang tawhte pualin, Mizoram Independent puan Diamond Jubilee lawmna, Ex Mizo National Army huaihawtin, Chanmari YMA Hall-ah an hmang a, hnam sipai leh an nupuite ṭhahnem tak an tel.
Hnam sipaia lo ṭang tawhte pual inkhawm-ah hian, zalenna sual laia Brig. General Tawnluia, Ex Army Chief-in thu a sawi a. "Kum 1966, kum tam tak kaltaah khan Mizo Hnam Pa Pu Laldenga kaihhruaina hnuaiah zalenna kan puang a. Independent an sual lo, tia MNF sawi ṭhinte hian an hresual a, thudik lo an sawi ṭhin a ni. Zalenna kha chiang takin kan sual a, kan martar pui a ni," a ti a. "Army Chief-ah kum 8 zet ka awm ve a, silaimu leh ral karah hun kan hmang a. Martar tam tak an awm bawk a ni. Kan theihna zawng zawngin Zoram zalenna nan kan thawk a, kan inpe a ni," a ti.
Ex Army Chief chuan, "He hnamin zalenna sang ber a neih theihna tura beia, mahni kea he hnam a din theihna tura beitu zawng zawngte zahna chibai vawiinah hian kan buk thar leh a ni. Martar-te thisen hlutzia kan hrereng a ni," a ti a. "Zalenna sual laia beitu zawng zawngte bakah, sipai sawisak leh hliam tuar te, in hal sak leh sawikhawm tuar te, Hnam sipai tana lo thawk tawh leh lo pui tawh zawng zawngte chungah lawmthu kan sawi a. Khawvel hmun hrang hranga Zohnathlak leh hmun hrang hranga awmte lawmthu sawina chibai kan buk bawk a ni," a ti.
Pu Tawnluia chuan, "Independent puan aṭangin India leh khawvelin Mizo hnam min hriat phah a. Zalenna sual nachang hre hnam, mahni dikna atana bei ngam hnam kan ni hi min zah phah hle a ni," a ti a. "Thangthar zelte'n nationalism hi chhawm nung zel se ka duh tak zet a ni," a ti bawk.
