ZPM chu kan danglam bik a, kan policy-ah kan innghat. ZPM Vice President
Vawiin Ni 24.2.2026 (Thawhlehni) khan ZPM Vice President C. Lalnunnema chuan, ZPM Mara Autonomous District Headquarters Office, Siaha Bazar-a mithar lawmluh inkhawm-ah thu sawiin, ZPM Vice President chuan "Thenkhatin Manifesto te chu kan inziah that siak mai mai an tih laiin, ZPM chu kan danglam bik a, kan policy-ah kan innghat a ni," a ti.
ZPM Vice President chuan, ram pum bakah Siaha District-a sorkar hmalakna hrang hrang te sawiin, "Kuthnathawktute hmakhua ngaiin, thlai thar lei leh hralhna tur budget-a kan dah te, crop insurance leh livestock ran vulh hripul vanga zangnadawmna thlengin kan buatsaih mek," a ti a. "Kawngpui siam chungchangah phei chuan ZPM chauh ni loin, Mizo mipuite kan lawm. Working season rei lo te chhungin khawpui chhung kawng Km. 83 sei kan siam zo tep a, a zim lai leh chhuk chho ulh zual te siam rem a nih vangin mipui an lawm a. Aizawl khawpui chauh ni lovin district headquarters zawng zawng kawng cheina tur pawisa sem chhuah niin, zinna apiangah kawngpui thawm that hmuh tur awm te hi thil lawmawm a ni,"a ti.
Healthcare chungchangah phei chuan mipui an lawm tulh tulh tih sawiin, tuna eptu party thenkhatin ba nei anga an sawi pawh hi, sorkar kal taa pawisa ba vung vung ang ni ni lovin, Empanelled hospital lovah pawh sorkar ngilneih vangin emergency thilah an lut a, cashless theih si loh bill hmanga pawisa pek ngai pek tura process mekte chauh an ni," ZPM Vice President chuan a ti bawk.
