AMC-a ni khat pawh la sorkar ve ngailo ZPM chu mipui ngaihah chuan nula thianghlim ang an ni. MNF President
Vawiin ni April ni 4, 2026 (Thawhtanni) khan Mizo Hnam Run chhung inkhawm-ah MNF President Zoramthanga chuan thu sawiin, "MNF-te chuan Sakawr chakna kan ring ve ngai lova, Tawlailir kan chhuang ngai heklo. A rawngbawl tur leh chanchintha hril tura Pathian din a ni. Kum 60 chuang min hruai tawhtu Pathianin kan chaklohna chu kan inzir nan leh kan inenfiah nan min hmansak zawk thin a. MNF min vawrh kang turin hun kal tawhah zirlai min zirtir chang a nei thin a. Ram leh mipui ngaihsakna kan neihte hi Pathianin kan felnaah min ruatsak a, zam lovin kan kal zel dawn a ni," a ti.
MNF President chuan, AMC-ah MNF-in thil tha-a bul tanin, danglam tha zawk a siam a. Chu chuan harsatna a siam thei a. Chu chu a thalo zawngin MNF-ah min burbun a. Kan tawrh phah ta a ni, a ti. AMC-a ni khat pawh la sorkar ve ngailo ZPM chu mipui ngaihah chuan nula thianghlim ang an ni a. Aizawl bial zawng zawng hi ZPM bial a ni a, Minister bial a ni deuh vek bawk a. Inthlan hmasa lamah an lo chaklo fo tawh bawk nen, theihtawp chhuahin engti zawng pawha tlin hrim hrim tumin an bei a, inthlan hun nasa taka pawtseiin mipui rilru hmin an tum a. Mipuiin MNF AMC tana sum an release duhlohte kha an hre ve silova, kan chelh thei ta lo a ni, a ti.
MNF President chuan, Pathianin mipui tam tak awmna India ramah, passport leh visa ngai miah lova a rawngbawl turin MNF te hi a din leh ruat kan ni a. Pathianin thil siam zawng zawngte hnena chanchintha hril tura min kohna hi MNF ten kan kalsan a thiang lova. Heti chin hi a tawk rih e, a tih chang a awm thin. Kum 60 chuang min hruaitu Lalpa min hruaina hi kan tan a tawk a, a hluin a hlawk ber a ni, a ti bawk.
He inkhawm-ah hian B. Lalawmpuii, AMC Corporator atana thlantlin lawmpuina hun hman a ni bawk.
