ZPM policy leh thutiamte kha Romei leh Chhimbal anga lung tileng ve thei a ni. An Party chhungah inngeihlohna lian tak a awm. TC.Pachhunga Ex-MLA
Vawiin ni 10 July, 2026 Zirtawpni hian Mizo Hnam Run chhung inkhawm-ah TC. Pachhunga Ex-MLA, Adviser GHQ chuan thu sawiin, ZPM sorkar chu mipui tihlunglen nan kalphung thar, politics-ah Pathian ram lo thleng rawh se, tiin an inzuar a, an MLA te chuan dik tak leh duhsak bik neilo turin thu an chham rual vel anih kha, tunah chuan an policy leh thutiamte kha Romei leh Chhimbal anga lung tileng ve thei, mahse, va hnaihchilh a, hmuh leh khawih tur awm silo, a piah deuha insawn zel ang hi a ni e, a ti.
TC Pachhunga chuan, an hotupa ber chuan mipui dawt tam tak min hrilh tawh a; CM-in portfolio a nei ve dawn lo, Car man toah a chuang ve dawn lo, Minister-in Car pakhat bak an kawl lo ang, CBI General consent kan pe ang, Bangla kan chei ve dawn lo, Restricted tender kan ti tlem ang tih leh keini chuan kan puk ve dawn lo te an ti a, Mizoram leiba-in nasa takin min delh mek a, kum 2026-2027 budget chu cheng vaibelchhe 17,076.92 anih laiin kan leiba chu cheng vaibelchhe 19,085.15 a ni. Kan budget aia kan leiba tamna cheng vaibelchhe 2008.23 a ni, a ti.
TC Pachhunga chuan, Mipui hnena an intiamna an tih hleih theihloh avangin, vawiin-ah chuan an party chhungah inngeihlohna lian tak a awm ta, CM-in President nihna chelhin VUC lam an lungawilo a, insawifiah turin lehkha an pe nghe nghe a ni, a ti a. Tourism Director pension tawh rawih nawn chungchangah CM-in Pu Sapa bulah Pi Lalrodingi rawih nawn lehna tur lehkha an thawn a, anni lamin an lo pawm thei silo, MZP-ten theihtawpa an do hnuah CM hnenah banna lehkha a thawn a, chuta tang chuan Pu Sapa department chan DP & AR pawh laksak zui nghal a ni. Tichuan, CM hian Home minister chu an party PAC thu zawmlo-ah puhin, a department chan DP & AR chu a laksak zui ta a ni, a ti bawk.
MNF Sr.Front President chuan, MNF hi Pathianin a hun takah min kochhuak thin a, tuna ZPM sorkar hi enchhin an ni a, an chhungkua an buai em em mai bawka, tunah hian ennawm mak tak kan en mek a ni, a ti a. Congress nise Delhi lamah an parvul thei tawh lo a, an hotunu ber Sonia Gandhi'in Lalna leh thuneihna a duh luatah inti kristian si a, fate tana Hindu pathiana hma a a tawngtaisak rahchhuah kha a ni, a ti bawk.
