ZPM sorkar chuan Corruption kan do let zel dawn. Jeje Lalpekhlua MLA
Vawiin ni 7.3.2026 (Inrinni) khan ZPM Thalai chuan thuchhuah siamin, ZPM Thalai President Jeje Lalpekhlua MLA -in, IAF ten Lengpui leh Sihphir ram an lak chungchangah, CBI in an chhui theihna tura Chief Minister Pu Lalduhoma'n Consent a pek avanga lawmawm an tih thu a sawi.
Jeje Lalpekhlua chuan, IAF in Lengpui leh Sihpir ram a lak chungchangah Corruption a awm thei nia rinhlehna a lian hle a, Mizoram mipuite pawhin CBI te inrawlh ngei turin an beisei hle a. Hetiang hi a kal chhoh dan a nih tak siah chuan Pu Ruata Sailo pawhin Lok Ayukta ah Complaint thehlutin, MPCC pawhin CBI-ah Complaint thehlutin, MNF pawhin Chief Vigillance Officer hnenah Complaint an thehlut bawk a ni, a ti.
ZPM Party pawhin CBI a Complaint thehluh hi kan tum hle nain, CBI, CVO leh Lok Ayukta-ah Complaint a luh tawh avaning, keini chuan mipui beisei anga he case hi CBI in an chhui ngei theih nan sawihonate neiin, 23rd February 2026 khan kan Chief Minister Pu Lalduhoma chuan a rang thei ang bera chhui turin CBI hnenah phalna a pe ta a ni, a ti a. Jeje Lalpekhlua chuan CBI te hian he case hi chhui tlaka an ngai a nih chuan an rinhlelh zawngte an chhui tawh mai dawn a, hei hian kan Chief Minister hi he case-ah hian a kut a fai zia a lang chiang hle a. Sorkar hmasateah case hrang hrang CBI chhui tir beisei tak tak mipuiin kan lo nei tawh thin a, hengah hian kan State Police-te an hmang mai thina, corruption liantak nia lang thinte pawh case hmawrbawkna lamah mipui beisei ang a pha thinlo hle a ni, a ti bawk.
ZPM Thalai President chuan, Hetiang hi Mizorama kan lo kaldan a nih thin lain, ZPM sorkar-ah chuan kan lo insawi lawk tawh ang ngeiin, kan Chief Minister Pu Lalduhoma chuan huaisen takin CBI hnenah General Consent a pe tawh a, tuna Lengpui leh Sihphir ram chungchangah pawh hian CBI in a chhui ngei theih nan chak takin hma a la a. Corruption a fihlim leh Mizoram Corruption tlem berna State-a min hlangkaitu Chief Minister kan neih chinah, Mizo mipuite pawn sorkarah rinna an nghat ta chu lawmawm an tih thu a sawi.
Jeje Lalpekhlua ZPM sorkar chuan Mizoram State chhungah Corruption kan do let zel dawna, hemi kawnga huaisen taka kawng sialtu Chief Minister Pu Lalduhoma kan nei hi a thlamuan thlak hle a ni, a ti bawk.
