Vawiin khan Mizoram PC Party Sr. Vice President Zosanglura chuan Durbar Inkhawm-ah ZPM sorkar in an duh phawt chuan Hydel project an siam theih tur thu leh tuna an kal dan atanga en erawh chuan an siam a rinawm loh thu a sawi.
Zosanglura chuan ZPM in an Election Manifesto-a Hydel project siam an tiam thu leh hemi atan hian kum tin budget-a cheng vbc 800 dah an tiam bawk thu sawiin, “Budget vawi hnih an siam tawhah cheng khat mah an dah lo thung,” a ti a. Hydel project siam lama hma an lak laiin Clearance dil chawp ngai hlir an buaipui avanga an sorkar term chhunga hna an tan a rinawm loh thu leh, an kal dan an thlak a, Clearance fel sa an buaipui duh erawh chuan hna an tan theih tur thu a sawi.
Mizoram tana Hydel project pawimawh zia leh Bairabi Project chungchang Zosanglura chuan sawiin, Bairabi Hydel Project hi Pu Thena kaihhruai PC sorkar-in bul an tan, Lal Thanhawla kaihhruai Congress sorkar-in Forest Clearance an hmuh leh Zoramthanga kaihhruai MNF sorkarin Environment Clearance an hmuh anih thu sawiin, “Kan sorkar kal tawh ten nasa taka an lo bawhzui rawn a ni,” a ti a. Tuna Lalduhoma kaihhruai ZPM sorkar-in a ngaihthah ta mai hi hriatthiam har a tih thu sawiin, inngaihtuah nawn tura a duh thu a sawi a. Sorkar kal tawh te hmalakna avanga pawisa a awm a bul tan nghal theih Bairabi Hydel Project bawhzui hi hydel project tihpuitlin duh tan chuan kawng awlsam ber anih thu a sawi bawk.
