Aizawl Press Club-a thuthar lakhawmtute an kawm naah MNF Legal Board Chairman chuan, Mizoram Presbyterian kohhran, Mizoram Synod in kum tam tak chhung a lo enkawl tawh leh kum 38 kalta, kum 1987 a-an kuta hlan tura sorkarin thutluknaa lo siam fel vek tawh Assam Rifles Biak in hmun chu chhuhsak an tum a ti a. May mi 5-a Chief Minister hova thukhawm chuan Aizawl khawpui chhunga Assam Rifles chhuahsan ram enkawl zui dan tur ngaihtuah kawnga thuneitu sang 'Advisory Committee on Assam Rifles Land Handed over to the Government of Mizoram' chuan Assam Rifles Kohhran Biak In hmun chu sorkar kuta a luh theih nan Synod dawrtu tur inruatin Convener ah Revenue Minister B. Lalchanzova an ruat niin a sawi bawk.
Biakin hmun Land Lease sorkara hlan tura ZPM sorkar ngenna chu Synod Officers Meeting chuan ngaihtuahin Synod Executive Committeeah a thlen a, Synod Executive Committee thukhawmah Assam Rifles Kohhran Biakin hmun chu kum 1950 hma lama Mizoram Bawrhsap-in Assam Rifles-a Mizo awmte inkhawmna tura a lo pek tawh a nih thu te, he Biak In hmun hi Assam Rifles ram ni loin, ram awl, Biak In hmun atana pek liau liau a nih thute sawi lan a ni, a ti a. Biakin hmun pek an nih dan zawng zawng ngaihtuuahin, sokara hlan chu a remchang loah Mizoram Synod chuan a ngai tih MNF Legal Board Chairman a sawi bawk.
MNF Legal Board Chairman chuan ZPM sorkar hmalakna chu MNF chuan demawm a tih thu sawiin Mizoram Synod hnena lekha dengkhawng tak a lo pek tawh pawh Assam Rifles Biak In November ni 22 leh ni 23-a Platinum Jubilee lawm an tum ve hma ngeia hnukkir leh vek turin ZPM sorkar an phut tih an sawi bawk a ni.
