Vawiin 2.20.2025 khan ZPM Southern Hqrs Lunglei hruaitute chuan Chief Minister Lalduhoma hnenah Lunglei Khawpui chhung kawngpui siam that a tul thu leh Chhim lamin Airport a mamawh thute, Lunglei khawpuiah Fire Sub. Station din belh a tul thute leh Lunglei District mamawh hrang hrangte an thlen.
ZPM Southern Hqrs Lunglei Elected OB te hian tukin khan Lunglei South bialtu MLA Lalramliana Papuia Inah Chief Minister hi tukthuan an kilpui a, Lunglei khawpui chhung kawngpui chu, siamthat a tul hle tawh tih hrilhin, PWD Lunglei road division-I hnen atanga thu an dawn danin Work Proposal siam a nih tawh thu leh, sorkara an thawn tawh chu Finance Approval nghah mek anih thu an hrilh a, khawpui chhung kawng chu siamthat thuai a tul tawh thu Chief Minister hi an hrilh a ni.
ZPM Southern Hqrs hruaitute chuan, Chhim lamin Airport puitling a mamawh thu Chief Minister hi an hrilh bakah, Hrangchalkawnah leh Serkawnah emaw, Zotlangah Fire Sub-Station dah sak turin, Chief Minister hi an ngen bawk a, Khawpui thang chho zelah Ramthara Fire Station chu Pukpui, Zotlang, Serkawn, Zohnuai, Zobawk , Lungpuizawl leh Hrangchalkawn te tan a hla lutuk nia sawiin, Fire Deptt thawktute an mamawhna phuhruk sak ngaihna a awm lo nia an hriat thu an thlen a ni.
Lunglei Market and Trade Center sak mek chungchang pawh thlenin, ZPM Party hruaitute chuan hna an thawk muang hle niin an sawi a, mipui mamawhna a nasat tawh avangin chak taka he hna hi thawh a nih a mipui chhawr theih tura a rang thei ang bera peih a nih theih nan hmalakpui turin Chief Minister hi an ngen a. Kum 2022 August ni 25 a sak tan a nih thu leh Kum 2024 August ni 25 a zo hman tura ruahman a nih thu sawiin, a hunchhunga zawh hman a nih loh avangin kumin September thla thleng hun pawh sei sak leh a nih thu an sawi a, tender amount cheng Vb 14.03 ah cheng Vbc 10.82 chu hnathawk tu pek a ni tawh nia sawiin, za zelah 83% an thawk tawh a, za zela 17% thawh hmabak ala awm niin an sawi bawk.
ZPM Southern Hqrs Lunglei hruaitute chuan Lunglei mipui leh thalai ten zan lama C. Thuamluaia Mual hman tangkai chu an thlahlel in an mamawhna a sang hle tih Chief Minister hi an hrilh bawk a, a remchan dan anga tihhlawhtlin vat tul an tih thu thlen in, sorkar hmasa in H.P.C Fund cheng nuai Rs. 20 senga floodlights an siam chu inkhelh nan a hman tlak loh niin an sawi a, Kum 2024 – 2025-ah SASCI sum cheng nuai 400 dah leh ni mah se, hman a ni ta lo nia sawiin, pavillion pawh a changtlung lo hle niin an sawi a, sak that anih theihnan hma laksak turin Chief Minister hi an ngen a, State Sports Academy Zobawk, sum tam tak senga hmalakna zawh fel tep tawh chu courtin a “Stay” avangin hman tangkai theih loha a awm a awm mek thu sawiin, tangkai taka hman thuai a nih theih nan hmalak pui turin Chief Minister hi an ngen bawk a ni.
ZPM Southern Hqrs. Lunglei hruaitute chuan Lunglei District mamawh hrang hrang an thlente, Chief Minister-in a chhan danah an lawm hle tih thuchhuah siamin an sawi a ni.
